आमाको ममता सरी जगतमा पाइन्छ के नै अरू
आफ्नो ज्यान समेत जोखिम गरी सन्तान दाताहरू
आमाको महिमा अपार छ यहाँ जानेर को सक्छर
आमा शव्द छ शव्दकोष भरिको आहा बडो सुन्दर ।
आमाले रस पान अमृत सरी वात्सल्य बर्षाउछिन्
हाम्रो जीवन मार्ग दर्शन सबै औल्याइ दर्साउछिन्
आमाको उपदेश हुन्छ पहिलो यो जिन्दगीको फल
हाम्रो जीवन माथि हुन्न कहिलै आमाहरूको छ्ल ।
आमा उद्गम श्रोत हुन् जीवनको संसार देखाउने
माया प्रेम दिएर शैशव ठुलो पारेर टेकाउने
न्यानो काख समान छैन जनको अन्यत्र केही पनि
आत्मैदेखि पुकार्छ आर्त जनले यै शव्द आमा भनी ।
आमाको जतिको मिठो र रसिलो मायाकहाँ हुन्छर
आमाको अतिरिक्त बाहु कसको प्यारो हुँदै छुन्छर
सारा चीज भुलेर बित्छ दिन यो बिर्सन्न आमा किन
आमानै पहिलो छ शव्द शिशुको बोली फुरेको दिन ।
आमा स्वर्ग समान दिव्य गहना शृंगार आभूषण
आमा तागत हुन् शरीर भरको उर्जा तथा पोषण
आमा अग्रिम श्रोतहुन् जीवनको भण्डारहुन् ज्ञानको
आमाको इतिहास मेट्न कसले सक्ला र सम्मानको
शनिबार, जेठ २४, २०७७
