देवेन्द्र आलोक, १३असार। केन्द्रीय तथ्यांक विभागको जनसंख्या घडीमा शुक्रबार मध्याह्न नेपालको जनसंख्या ३ करोड ६३४ जना देखाइएको छ । बोलीचालीको भाषामा प्रयोग गरिदै आएको नेपालको जनसंख्या तीन करोड भन्ने भनाई अनुसार अब जनसंख्याको घडीमा नेपालको जनसंख्या तीन करोड नाघेको छ ।
शुक्रबार मध्याह्न केन्द्रीय तथ्यांक विभागको जनसंख्या घडीमा नेपालको जनसंख्या ३ करोड ६३४ जना देखाएको विभागका महानिर्देशक नेविनलाल श्रेष्ठले बताए । श्रेष्ठले २०६८ को जनगणनाको आधारमा सेट गरिएको घडीको आधारमा यो वैज्ञानिक प्रक्षेपण गरिएको जनसंख्या भएको बताए । घडीले जन्मदर, मृत्युदर र बसाइँसराइ दरको आधारमा जनसंख्या देखाउँछ । २०६८ सालको जनगणनाअनुसार नेपालको जनसंख्या दुई करोड ६४ लाख ५४ हजार ५०४ थियो । १२ औं राष्ट्रिय जनगणना २०७८ असारमा हुँदैछ ।
जनसंख्याले दिएको अवसर दैनिक जनसंख्या वृद्धि एक हजारदेखि एक हजार एक सय रहेको विभागले जानकारी दिएको छ ।जनसंख्या वृद्धिदर घट्दो क्रममा रहेको विभागका निर्देशक ढुण्डीराज लामिछाने बताउँछन् । लामिछानेका अनुसार जन्मदर र मृत्युदर दुवै घट्दो क्रममा छ । बसाइँसराइ अनुपातमा भने खासै फरक नआएको उनले जानकारी दिए । श्रम बजारमा १५ देखि ६० वर्षलाई उत्पादनशील जनसंख्या मानिन्छ ।
नेपालका झण्डै दुई तिहाइ जनसंख्या १५ वर्षदेखि ६४ वर्ष उमेर समूहका रहेको जानकारहरू बताउँछन् । जनसंख्याका प्राध्यापक डा. योगेन्द्रबहादुर गुरुङ जनसंख्यामा यस्तो अनुकूलकता सधैं नआउने बताउँछन् । उनी भन्छन्, ‘देशले आर्थिक समृद्धि हासिल गर्नका लागि सबैभन्दा उपयुक्त जनसंख्याको आकार यही हो ।
