राजवंशी भाषिक कविता : “यिला भात हएना पन्ता ?”
अन्तर , मन्तर .. जन्तर
यिला हएना .. कि फु-मन्तर?
धर्म-पहिचान जराले .. हामार दादोला,
कार्यक्रम उदघाटन करेचे .. पार्टीर नेताला।
हाय रे हामार .. संस्था ,
यिला भात हएना .. पन्ता ?
घरते छे बारीघुरा .. घरते टिँकीफला,
धक्रा बेना दादीलाअ .. निक्लिल बत्कल्ला।
हल्हलाचे ढाल्-पेटानी .. जाहे? आखँर निजाने तलाँ
पढिए लेखिए छुवा निक्लिल .. कार्यक्रमेर जँल्जला।
हाय रे हामार .. संस्था ?
यिला भात हएना .. पन्ता ।।
टाँकाते टँल्टलाचे काँह .. टाँइ सुटेर पर जामा,
धर्म-संस्कृतिलाक थिताए .. गार्हेचे नाँकि खाँमा।
हल्बल, हल्बल करे .. कुटुम्बेर हाँली गुथिए
बाँसेर आगाँलित चर्हिए .. काका-जेठोर पिठिते मामा।
नाताबादे हिलाचेना .. कि झाण्टा ,
चिन्हिएने छिट्काईना ..यिला भात हएना पन्ता ??
भाषा धर्म कुन्तीर .. जात हामार तिनतीर
अस्तित्व पहिचान बाचुवार .. निछे कोई फिकिर।
आफ्ने आफ्ने जान देछे .. भाँमबँकला ,
दुधिया छुवालाक .. बेनाए पँकला।।
हाय रे हामार .. संस्था
चिन्हिएने छिट्काईना ..यिला भात हएना पन्ता ??
सिर्हते बर्षिले मेघ .. उठुवा पारे बाँना ,
जिमिन्दारी’से देउनीया भाँसिल .. सुकुम्बासीते काँना।
बाकी एक्टा यैड् संस्था .. बचाईना जतन करे,
भावी-पुस्तार भबिष्य .. मिलिए अर्पण करे।
धुत्ती, गेन्जी कमँरत .. बान्धिए जातेर गम्छा,
चिन्हाएने छिट्काईना .. यिला भात हएना पन्ता।।
