राजवंशी भाषिक कविता : “बइसेर जोवन”

राजवंशी भाषिक कविता : “बइसेर जोवन”

रस रसाँइचे .. फुलेर जोवन
फलते .. टँपा बान्धिचे ।
देख्ते देख्ते .. हामार माई
आलँन् .. खँपा बाँन्धिचे।।

काल्हीए त छिले .. लेफासाग
आझी हईचे .. ढँस-ढँस ।
हल्हलाचे केङकरे .. बइसेर जोवन
आझी त .. पेटानी बाँन्धिचे ।।

दँग्दग् मनेर .. लँस्लस् फेर्कुशी
कैजान कैजान .. कुन्हियासे आँनिचे।
बेदेखा बइसेर .. ना छे काँह गुरु?
देहारत् ना .. गठबन्धन बाँन्धिचे।।

काँहार बादे छिर्याचे .. महक बासना?
कैजान केङकरे .. ना काँह भान्दिछे।
सपन कुराचे ना .. बिधिर मते संसार
ना रसाँल् देहाड् .. आफ्ने छाँन्दिचे।।

खुदह खुदह ,देखँना .. तलेर माटी,
यिड् देहा गो .. केङकरे खाँन्दिचे।
दुबिधा बइसेर .. नि मिल्चे पात्र-गणना
ना बेटी, यिड् जोवन .. कुराए आँन्दिचे।।

जोगेन्द्र प्रसाद राजवंशी *
कचनकवल :- ३, दल्की झापा
हाल :- मलेसिया