नेपाली महिला राष्ट्रिय फुटबल टोलीले आज साँझ दशरथ रङ्गशालामा साफ च्याम्पियनसिपको उपाधि जित्ने लक्ष्यका साथ ऐतिहासिक फाइनल खेल खेल्दैछ। साफ च्याम्पियनसिपको सुरुआत सन् २०१० मा भएको थियो, र नेपाल अहिलेसम्म पाँच पटक फाइनलमा पुगे पनि उपाधि हात पार्न असफल भएको छ। तर यसपटक घरेलु मैदानमा खेल्दा टोली उच्च मनोबलका साथ मैदानमा उत्रिने छ।
मुख्य प्रशिक्षक राजेन्द्र तामाङले अघिल्ला गल्तीहरूबाट पाठ सिक्दै यसपटक नेपालले जित हासिल गर्नेमा आफू आशावादी रहेको बताउनुभएको छ। २०१४ मा पाकिस्तानमा भएको प्रतियोगितामा भारतसँग ६(० गोलले पराजित भएपछि उपाधिको सपना टुटेको थियो। यसपटक, नेपालले भारतलाई सेमिफाइनलमा हराउँदै फाइनलमा स्थान बनाएको छ भने बङ्गलादेशले भुटानलाई पराजित गर्दै फाइनल यात्रा तय गरेको छ।
आजको फाइनल खेल नेपाली फुटबलका लागि ऐतिहासिक बन्ने सम्भावना छ, जसमा नेपाली समर्थकहरूको ठूलो उपस्थितिमा खेलको उत्साह झनै बढ्नेछ। खेल साँझ ६:३० बजे दशरथ रङ्गशालामा सुरु हुनेछ, र सम्पूर्ण देशले नेपाली टोलीलाई समर्थन गरिरहेको छ।
