पोखरा । बागलुङमा पिक अप भ्यान दुर्घटना हुँदा ५ जनाको मृत्यु भएको छ भने १ जना घाइते भएका छन्। दुर्घटना जैमिनी नगरपालिका–८ छिस्ती केवईबाट कुस्मिसेरा हुँदै बागलुङ बजारतर्फ जाँदै गरेको ग २ च ९२४७ नम्बरको भ्यान सोमबार बिहान करिब १० बजे जैमिनी–७, जैदी र छिस्तीको सिमाना नजिकै भएको हो। उक्त भ्यान सडकबाट करिब ५ सय मिटर तल खस्दा गम्भीर दुर्घटना भएको हो जसका कारण पाँच जनाले घटनास्थलमै ज्यान गुमाएका छन्।
मृत्यु हुनेमा भ्यान चालक ४१ वर्षीय महेन्द्र पुन, २० वर्षीया रश्मी श्रीष, ७० वर्षीया नन्दकली पुन, १७ वर्षीय नीरज श्रीष, र ७३ वर्षीय कुलप्रसाद श्रीष रहेका छन्। ४५ वर्षीय गंगाबहादुर श्रीष दुर्घटनामा गम्भीर घाइते भएका छन्। उनको प्रारम्भिक उपचार दुर्घटनास्थलमै गरिएको र थप उपचारका लागि पोखरा पठाइएको वडाध्यक्ष विमल श्रीषले जानकारी दिएका छन्।
दुर्घटना के कारणले भएको भन्ने विषयमा स्पष्ट कारण पत्ता लागेको छैन, तर कच्ची सडकमा गाडीको स्टेयरिङ फेल भएर दुर्घटना भएको हुन सक्ने अनुमान गरिएको छ।
