काठमाडौं । जीवनको उत्पत्ति र क्रम विकासमा वेद–वेदान्त र विज्ञानबीच संवाद विषयक अन्तर्राष्ट्रिय सम्मेलन सुरु भएको छ । शनिबार काँडाघारीस्थित अक्षरा स्कुलमा दुईदिने प्रथम अन्तर्राष्ट्रिय सम्मेलन सुरु भएको हो ।
सम्मेलनलाई कागेश्वरी मनोहरा नगरपालिका मेयर उपेन्द्र कार्कीले उद्घाटन गरेका थिए । उद्घाटनसत्रमा मेयर कार्कीले पितापुर्खाले सिकेको गुरुकुल शिक्षा र संस्कृति अहिले हराउँदै भएको बताए । उनले फेरि पुरानै गुरुकुल शिक्षालाई बिउँत्याउनुपर्ने आवश्यकता देखिएको बताए । सम्मेलनले वेद वेदान्त र विज्ञानका बारेमा गहन जानकारी दिएर अहिलेको पुस्तालाई उचित मार्ग प्रदान गर्न कार्यपत्र प्रस्तुत गर्ने उनको विश्वास छ ।
दुई दिनसम्म संचालन हुने सम्मेलनमा विभिन्न ३५ देशका ४० भन्दा धेरै प्रतिनिधिको सहभागिता छ । जीवनको उत्पत्ति र क्रम विकासमा वेदान्त र विज्ञानबीचको संवाद विषयक प्रथम अन्तर्राष्ट्रिय सम्मेलनमा सनातन संस्कृतिभित्रका अनुकरणीय विषयलाई विज्ञानसँग जोडेर छलफल हुने अक्षरा स्कुलका कार्यकारी निर्देशक अन्जु भट्टराईले बताउनु भयो । ।
आध्यात्मिक संस्कृति तथा विज्ञानका लागि श्रीचैतन्य सारस्वत सभा र सनातन अध्ययन तथा अनुसन्धान प्रतिष्ठान नेपालद्वारा संयुक्त रूपमा आयोजित सम्मेलनमा डा. भक्ति विज्ञान मुनि महाराज, संहिताशास्त्री अर्जुन बास्तोला, वरिष्ठ न्युरोलोजिस्ट डा. जेपी अग्रवाल, प्राध्यापक डा. मोहनप्रसाद खरेल र श्रीपद कृष्ण केशव प्रभु, डा. सुमंगलादेवी दासीलगायत नेपाल, भारत, अमेरिकाका साथै विभिन्न देशका २० जनाभन्दा बढी प्रतिष्ठित आध्यात्मिक चिन्तक, अभियन्ता, गुरुहरू र वैज्ञानिकहरुको आ-आफ्नो कार्यपत्र पेस गर्ने कार्यक्रम रहेको छ ।
