झापा. ९ मंसिर । झापा जिल्लाको शिवसताक्षी नगरपालिकामा भएको सडक दुर्घटनामा तीनजना विद्यार्थी घाइते भएका छन्। आज बिहान करिब ११ बजे शिवसताक्षी–८ स्थित भित्री सडकखण्डमा शीतल चोकबाट ढुंगेल चोकतर्फ गइरहेको मोटरसाइकल (प्र. १–०१–०१७ प २४०८) अनियन्त्रित भई उनीहरूलाई ठक्कर दिएको हो।
घाइते विद्यार्थीहरूमा शिवसताक्षी–८ निवासी सुमित्रा राईका छोरा १२ वर्षीय जलन राई, महेश राईका छोरा ४ वर्षीय योगेश राई, र राजकुमार राईका छोरा ११ वर्षीय रिजन राई छन्।
• जलन राई: छातीमा समस्या देखिएको, बाहिरी चोट नभए पनि अवस्था मध्यम।
• योगेश राई: निधारमा चोट लागेको, बोल्न सक्ने, अवस्था सामान्य।
• रिजन राई: दाहिने हातमा चोट लागेको, अवस्था सामान्य।
तीनैजना विद्यार्थीहरूलाई उपचारका लागि बिर्तासिटी अस्पताल, बिर्तामोडमा लगिएको छ। मोटरसाइकल चालक शिवसताक्षी–८ निवासी २४ वर्षीय अनिश प्रसाई पनि दुर्घटनामा घाइते भएका छन्। उनको पनि उपचार भइरहेको छ भने मोटरसाइकललाई इलाका प्रहरी कार्यालय झिलझिलेले नियन्त्रणमा लिएको छ। दुर्घटनाबारे थप अनुसन्धान भइरहेको जिल्ला ट्राफिक प्रहरी कार्यालय, झापाले जानकारी दिएको छ।
