हल्दिबारी १६ माघ । देशको पश्चिमी भू-भागमा हाल पश्चिमी न्यून चापीय प्रणालीको प्रभाव देखिएको जल तथा मौसम विज्ञान विभाग, मौसम पूर्वानुमान महाशाखाले जनाएको छ। गण्डकी, कर्णाली, र सुदूरपश्चिम प्रदेशका पहाडी भू-भागमा आंशिक बदली रहेको छ भने बाँकी भू-भागमा मौसम मुख्यतया सफा छ।
तराईका धेरै स्थानहरूमा बिहानैदेखि हुस्सु र कुहिरो लागेपछि जनजीवन प्रभावित भएको छ। कोशी र मधेश प्रदेशका तराई क्षेत्रमा लागेको हुस्सु अपराह्नपछि सुधार आउनेछ भने सुदूरपश्चिमका तराई क्षेत्रमा मध्यान्हसम्म र अन्य क्षेत्रमा मध्यान्नपछि क्रमिक सुधार हुने अनुमान गरिएको छ।
मौसम पूर्वानुमान महाशाखाले हुस्सु र कुहिरोका कारण सडक तथा हवाई यातायातमा प्रभाव पर्न सक्ने भन्दै आवश्यक सतर्कता अपनाउन आग्रह गरेको छ। स्वास्थ्यमा समेत असर पार्न सक्ने भएकाले सर्वसाधारणलाई सावधानी अपनाउन अनुरोध गरिएको छ।