काठमाडौं । नेपाली कांग्रेसका पूर्वमहामन्त्री तथा पूर्वउपप्रधानमन्त्री कृष्णप्रसाद सिटौलाले मुलुकमा स्थापित गणतन्त्र र संघीयता कसैले हल्ला गरेकै भरमा नजाने बताएका छन्।
शनिबार नेपाली कांग्रेस पूर्वआप्रवासी समन्वय विभागले पार्टी मुख्यालय सानेपामा आयोजना गरेको कार्यक्रममा बोल्दै सिटौलाले गणतन्त्रलाई उल्ट्याउन सकिने आशंका निराधार भएको जिकिर गरे।
‘गणतन्त्र नै जान्छ कि जस्तो, गणतन्त्र आएकै दिनदेखि त्यो देखिएकै हो। राजाका बिरुद्द बोल्नै नपाइने, संसदमा प्रश्न उठाउनै नपाइने अवस्था थियो। दरबारको प्रशासन राजाकै पहुँचमा थियो। त्यही अवस्थामा वीरेन्द्रको वंश नाश भयो। त्यो बेला नै राजालाई संसद मातहत राखेको भए सायद त्यस्तो घटना पनि हुने थिएन होला,’ सिटौलाले भने।
उनले परिवर्तनपछि जनताले स्वतन्त्रताको अनुभूति गर्न पाएको र आफ्ना विचार राख्न पाएको भन्दै लोकतान्त्रिक व्यवस्थाले नागरिकलाई अधिकार प्रदान गरेको बताए। ‘परिवर्तनपछि देशमा जनताले स्वतन्त्रताको अनुभूति गर्न पाएका छन्, आफ्ना कुरा राख्न पाएका छन्। त्यो भन्दा अघि कस्तो थियो, अहिले के छ, तुलना गरौं,’ उनले थपे।
सिटौलाले राज्य संरचनामा बस्नेहरुको कमजोरीका कारण व्यवस्थामाथि बेलाबखत प्रश्न उठ्ने गरेको बताउँदै सुधार आवश्यक रहेकोमा जोड दिए। उनले जनतालाई सेवा प्रवाहमा ढुक्क हुने वातावरण नबन्दा प्रश्न उठ्न सक्ने उल्लेख गरे।
संविधान संशोधनबारे सहमति आवश्यक
नेता सिटौलाले संविधान संशोधनबारे दलहरूबीच सहमतिको आवश्यकता रहेको बताए। संविधान स्थिर नभएको र आवश्यक परे संशोधन गर्न सकिने भन्दै उनले यसबारे व्यापक सहकार्य आवश्यक हुने धारणा राखे।
‘संविधान संशोधन देशको हितमा छ भने गर्नुपर्छ। कांग्रेस एक्लैको मतले पुग्दैन। एमालेसँगको सरकार छ, तर एमाले मात्र जोडिएर पनि पुग्दैन। अरुलाई पनि साथ लिनै पर्छ। देशको हितमा भएका कुरामा कांग्रेसले अग्रसरता लिनुपर्छ, लिन्छ,’ उनले भने।
कार्यक्रमका सभापति तथा समन्वय विभाग प्रमुख दिनेश कोइरालाले विदेशबाट फर्किएकाहरूलाई देशमै रोजगारी सिर्जना गर्ने वातावरण बनाउन कांग्रेसले अग्रसरता लिनुपर्ने बताए। सहभागीहरूले विदेशमा पार्टीको जिम्मेवारी निभाएर फर्किएकाहरूलाई पार्टीले अवसर दिनुपर्ने सुझावसमेत दिए।
