बलिउड सुपरस्टार शाहरुख खान आफ्नो बहुप्रतिक्षित आगामी फिल्म ‘किङ्ग’ को छायांकनका क्रममा घाइते भएका छन्। मुम्बईको गोल्डन टोबैको स्टुडियोमा एक एक्सन दृश्य खिच्ने क्रममा उनी घाइते भएको बलिउड हंगामाले स्रोतको हवाला दिँदै जनाएको छ।
स्रोतका अनुसार, शाहरुखलाई कहिले र कुन परिस्थितिमा चोट लाग्यो भन्ने स्पष्ट विवरण सार्वजनिक भइनसकेको भए पनि हाल उनी अमेरिकामा उपचाररत छन्। मांसपेशीमा चोटका कारण उनलाई सर्जरी गरिनुपरेको जनाइएको छ। चिकित्सकहरूले उनलाई कम्तीमा एक महिनासम्म पूर्ण आराम गर्न सल्लाह दिएका छन्।
यस घटनाका कारण ‘किङ्ग’ फिल्मको सुटिङ तालिका प्रभावित भएको छ। जुलाई र अगस्ट महिनामा फिल्म सिटी, गोल्डन टोबैको स्टुडियो र वाईआरएफ स्टुडियोमा तय गरिएको छायांकन कार्यक्रम रद्द गरिएको छ। निर्माण टिमका अनुसार अब सुटिङ सेप्टेम्बर वा अक्टोबर महिनाबाट मात्र सुरु हुने अनुमान गरिएको छ, जब शाहरुख पूरै निको हुनेछन्।
सिद्धार्थ आनन्दको निर्देशनमा तयार हुँदै गरेको ‘किङ्ग’ फिल्म सन् २०२६ मा रिलिज गर्ने योजना बनाइएको छ। फिल्मको छायांकन भारत र युरोपका विभिन्न लोकेशनमा गरिने छ। यस फिल्ममा शाहरुखकी छोरी सुहाना खानको समेत अभिनय रहनेछ, जसले यसै फिल्ममार्फत बलिउडमा ठूला पर्दाको डेब्यु गर्नेछिन्। फिल्ममा दीपिका पादुकोण, अभिषेक बच्चन, रानी मुखर्जी र अनिल कपूर पनि प्रमुख भूमिकामा देखिनेछन्।
शाहरुख खान पछिल्ला वर्षहरूमा ‘पठान’, ‘जवान’ र ‘डंकी’ जस्ता ब्लकबस्टर फिल्ममार्फत दर्शकमाझ फर्किएका थिए। उनी अघिल्लो पुस्ताका सबैभन्दा मेहनती कलाकारमध्ये एक मानिन्छन्। उनको करिअरमा घाइते हुने घटना नयाँ होइन। ‘कोयला’ को सुटिङका क्रममा घुँडामा लागेको चोट ‘रा.वन’ फिल्मको समयमा गम्भीर बनेको थियो, जसका कारण उनले शल्यक्रिया गराउनु परेको थियो। पछि आर्थोस्कोपिक सर्जरीसमेत गराएका थिए। शाहरुखको स्वास्थ्य चाँडै सुधार होस् भन्ने शुभकामना उनका फ्यानहरूले सामाजिक सञ्जालमार्फत व्यक्त गरिरहेका छन्।
