झापा, साउन १२ गते । झापाको मेचिनगर नगरपालिका–१२ सरेडाँगीस्थित मेचि राजमार्गमा सवारी दुर्घटनामा एक पुरुषको ज्यान गएको छ।
मिति २०८२ साउन ११ गते साँझ ७:३० बजे इलामबाट चारआलीतर्फ आउँदै गरेको हाल नम्बर नखुलेको सेतो रङको स्कर्पियो गाडीले एक अन्दाजी ४५/४६ वर्षका अज्ञात पुरुष पैदल यात्रीलाई ठक्कर दिँदा गम्भीर घाइते भएका थिए। गम्भीर अवस्थाका ती व्यक्तिलाई तत्काल उपचारका लागि बिर्तामोडस्थित बीएण्डसी अस्पताल लगिएकोमा राति ८:०० बजे अस्पताल पुर्याउनेबित्तिकै चिकित्सकले मृत घोषणा गरेका थिए।
दुर्घटनापछि फरार रहेको उक्त सवारी साधन र चालकको खोजी गर्ने क्रममा राति १०:३० बजे गाडीसहित झापाको अनारमनीस्थित ईलाका प्रहरी कार्यालयमा सम्पर्कमा आएको प्रहरीले जनाएको छ। ठक्कर दिने गाडी मे. १ च. ६१३१ नम्बरको स्कर्पियो रहेको र चालक झापा, हल्दिबारी गाउँपालिका–१ निवासी ४८ वर्षीय गजेन्द्र बहादुर बिष्ट रहेका छन्।
प्रहरीले गाडी र चालकलाई नियन्त्रणमा लिई आवश्यक अनुसन्धान तथा कानुनी प्रक्रिया अघि बढाएको जानकारी दिएको छ।
