देवेन्द्र के. ढुङगाना
स्वस्थ जीवनशैलीका लागि हाम्रो पहुँचमा रहेका केही किफायती तर अत्यन्त पौष्टिक खानाहरूलाई ‘सुपर फूड’ भनिन्छ। अण्डा त्यसैमध्ये एक हो — सजिलै उपलब्ध, स्वादिष्ट र पोषकतत्वको खजाना।
अण्डामा भिटामिन ए, भिटामिन बी–१२, फलाम, जिंक, फस्फोरस, सेलेनियमजस्ता महत्त्वपूर्ण तत्वहरू पाइन्छन्, जसले शरीरलाई शक्तिशाली बनाउनुका साथै फिट, जीवन्त र हड्डीहरूलाई बलियो राख्न मद्दत गर्छ। एउटा अण्डामा करिब ७७ क्यालोरी ऊर्जा हुन्छ। यसबाहेक, यसमा ६ ग्राम उच्च गुणस्तरको प्रोटिन, ०.५६ ग्राम कार्बोहाइड्रेट र ५ ग्राम बोसो पाइन्छ।
अण्डाको सेतो भागमा रहेको एल्बुमिन उच्च गुणस्तरको प्रोटिन हो भने पहेँलो भागमा रहेको ल्युटिन आँखाको स्वास्थ्यका लागि अत्यन्त लाभदायक हुन्छ। ल्युटिनले दृष्टि समस्या कम गर्न मद्दत गर्छ। यसमा रहेको बायोटिन नङ र कपाललाई कमजोर हुनबाट बचाउँछ। स्मरणशक्ति र मस्तिष्क विकासमा पनि यसको भूमिका महत्वपूर्ण हुन्छ।
अण्डामा भएको प्रोटिनले तौल नियन्त्रणमा मद्दत गर्छ। तौल घटाउने आहारमा रहेकाहरूले पनि सन्तुलित मात्रामा अण्डा खान सक्छन्। यसमा भएको बोसो मुख्यतया मोनोअनस्याचुरेटेड हुन्छ, जसको अर्थ यो लगभग हानिकारक हुँदैन। आधुनिक अनुसन्धानले प्रमाणित गरेको छ कि अण्डाको पहेँलो भागले खराब कोलेस्ट्रोल (LDL) घटाउन र राम्रो कोलेस्ट्रोल (HDL) बढाउन मद्दत गर्छ।
स्वस्थ व्यक्तिले स्वाद, पोषण र सन्तुलित आहारको हिसाबले अण्डालाई प्राथमिकता दिन सक्छन्। तर कसरी र कहिले खाने भन्नेबारे पोषणविद्को सल्लाह लिनु उपयुक्त हुन्छ। अत्यधिक तेल र मसालासँग अण्डा खानाले तौल नियन्त्रणमा समस्या आउन सक्छ।
यदि तपाईंलाई मोटोपना (Obesity), फ्याटी लिभर वा उच्च रक्तचापजस्ता समस्या भए पनि, उमालेको अण्डा नियमित रूपमा निडर भएर खान सकिन्छ।
त्यसैले, अण्डा — सस्तो तर अत्यन्त लाभदायक सुपर फूड हो।
