झापा, कार्तिक १० । झापाको हल्दीबारी गाउँपालिका–४ मा रहेको श्री पाथिभरा सिंहकाली धार्मिक तथा पर्यटकीय परिसर भित्र गएराति दुईवटा जंगली हात्ती पसेर क्षति पुर्याएको छ।
कार्तिक ९ गते राति करिब १२ बजे तिर मन्दिर परिसरमा पसेका हात्तीहरूले मन्दिरको स्टोर भवनको बायाँपट्टिको झ्याल र कम्पाउन्ड वाल भत्काएको प्रचौ जलथल प्रहरीले जनाएको छ।
मन्दिर व्यवस्थापन समितिका अध्यक्ष जयप्रसाद पोखरेल का अनुसार हात्तीको प्रवेशले करिब २० हजार रुपैयाँ बराबरको भौतिक क्षति भएको छ। अन्य कुनै मानवीय क्षति भने नभएको उनले बताए।
घटनापछि प्रचौ जलथलबाट प्रहरी टोली खटिएर स्थलगत निरीक्षण गरिएको र हात्तीहरूको गतिविधि नियन्त्रणमा लिनका लागि स्थानीय निकायसँग समन्वय भइरहेको प्रहरी स्रोतले जनाएको छ।
हल्दीबारी क्षेत्रका स्थानीय बासिन्दा पछिल्ला दिनमा जंगली हात्तीको बारम्बार आवागमनले त्रसित बनेका छन्। उनीहरूले वन कार्यालय र स्थानीय प्रशासनले प्रभावकारी रोकथामको पहल गर्नुपर्ने माग गरेका छन्।
