हल्दिबारी, झापा । हल्दिबारी गाउँपालिका–३ का वडा सदस्य अजित कुमार विष्ट पछिल्लो समय अटो व्यवसायतर्फ आकर्षित भएका छन्। आर्थिक उपज बढाउँदै स्वदेशमै आत्मनिर्भर बन्ने र युवाहरूसमक्ष उद्यमशीलताको उदाहरण प्रस्तुत गर्ने उद्देश्यले उनले यो पेशा सुरु गरेका हुन्।
मेची बहुमुखी क्याम्पसबाट स्नातक तहसम्मको अध्ययन पूरा गरेका विष्ट विवाहित छन्। उनी श्रीमती र दुई छोरासहितको सानो तर सुखी परिवारमा बस्दै आएका छन्। करिब एक दशक विदेशमा श्रम गरेर आम्दानी संकलन गरेका उनले सन् २०७७ सालमा स्वदेश फर्कने निर्णय गरेका थिए।
“देशमै अवसर खोज्ने र रोजगारी सिर्जना गर्ने सोचका साथ फर्किएको हुँ,” विष्ट भन्छन्, “गाउँकै युवाहरूसँग मिलेर केही नयाँ काम गर्न चाहन्छु।”
विदेशी रोजगारबाट फर्किएपछि उनले प्रारम्भमा कृषि पेशामा संलग्न हुँदै आत्मनिर्भर बन्ने प्रयास गरे। अहिले उनी कृषिसँगै अटो व्यवसायलाई नयाँ सम्भावनाको रूपमा अघि बढाइरहेका छन्।
२०७९ सालको स्थानीय तह निर्वाचनमा एमालेका तर्फबाट प्रतिस्पर्धा गर्दै विष्ट ८८८ मत प्राप्त गरी वडा सदस्यमा निर्वाचित भएका थिए। उनले राप्रपाका उम्मेदवार कृष्णबहादुर गिरीलाई १७० मतले पछि पार्दै विजय हासिल गरेका थिए।
“राजनीति, समाजसेवा र व्यवसायलाई सँगसँगै अघि बढाउन सकिन्छ भन्ने उदाहरण दिन चाहन्छु,” विष्टले आत्मविश्वासका साथ भने।
हाल उनी अटो सञ्चालनसँगै कृषिक्षेत्रमा पनि लगानी विस्तार गर्ने तयारीमा छन्। उनका अनुसार गाउँपालिकाभित्र बेसार, तोरी र कोसेबाली उत्पादनमा लगानी गरी स्थानीय रोजगारी र आर्थिक सशक्तीकरण बढाउने योजना बनाइएको छ।
“अर्काको देशमा पसिना बगाएर होइन, आफ्नै माटोमा काम गरेर आत्मनिर्भर बन्न सकिन्छ,” विष्टले जोड दिए, “आर्थिक अनुभव र सीपलाई अब देशमै प्रयोग गर्न चाहन्छु।”
राजनीतिलाई सेवामूलक कार्यको रूपमा लिने विष्ट जनताको विश्वास जित्न निरन्तर सक्रिय छन्। उनका अनुसार, “राजनीति, व्यवसाय र समाजसेवा सँगसँगै अघि बढे भने गाउँको मुहार परिवर्तन गर्न सकिन्छ।”
विष्ट अबका दिनमा गाउँका युवालाई व्यवसायतर्फ प्रेरित गर्दै गाउँलाई आत्मनिर्भर बनाउने दीर्घकालीन योजना अघि बढाइरहेका छन्।
