झापा ।मधेश प्रदेशमा एक अभूतपूर्व राजनीतिक घटना घटेको छ। प्रदेश प्रमुखले मध्यरातमा होटलभित्रै मुख्यमन्त्रीलाई शपथ गराएको विषय सार्वजनिक भएपछि ठूलो विवाद चर्किएको छ।
बर्दिबास नगरपालिका–३ स्थित पानस कटेज नामक होटलमा गोप्य रूपमा शपथ ग्रहण कार्यक्रम गरिएको आरोप लागेको हो। घटनाको विवरण बाहिर आएपछि राजनीतिक तहदेखि आम नागरिकसम्म आलोचना र प्रश्न उठेका छन्।
प्राप्त जानकारीअनुसार, प्रदेश प्रमुखले बिरामी भएको बहाना बनाएर काठमाडौं जान लागेको सूचना दिएका थिए। तर त्यसकै बीचमा उनी बर्दिबास आइपुगी होटलमै “गोप्य शैलीमा” मुख्यमन्त्रीलाई शपथ गराएको आरोप लगाइएको छ।
राजनीतिक विश्लेषकहरूले यस कदमलाई संविधानको उल्लंघन र प्रक्रियाविहीन निर्णयको रूपमा व्याख्या गरेका छन्। संवैधानिक र औपचारिक कार्य (शपथ ग्रहण)लाई रातिको समयमा होटलभित्र सम्पन्न गर्नु नै विधिको शासनमाथिको ठेस भएको उनीहरूको टिप्पणी छ।
स्रोतहरूका अनुसार, यस घटनाले मधेश प्रदेशको राजनीतिक वातावरणमा नयाँ तनाव सिर्जना गरेको छ। प्रदेशका केही नेताहरूले तत्काल घटनाको छानबिन गरी स्पष्ट विवरण सार्वजनिक गर्न माग गरेका छन्।
स्थानीयवासी र विभिन्न दलका नेताहरूले भने यस्तो कार्यले मधेशको राजनीतिक गरिमामा धक्का पुगेको बताउँदै प्रदेश प्रमुखमाथि नै प्रश्न उठाएका छन्।
“संविधान र प्रक्रियालाई पन्छाएर गरिएको यो कदम अत्यन्तै चिन्ताजनक र गैरकानूनी देखिन्छ,” एक स्थानीय जनप्रतिनिधिले प्रतिक्रिया दिएका छन्।
