झापा, २८ मंसिर । नेकपा एमालेको ११औं महाधिवेशन प्रतिनिधि चयनका लागि झापा क्षेत्र नम्बर ३ मा मतदान प्रक्रिया भोलि सुरु हुँदैछ। यस क्षेत्रबाट ६ प्रतिनिधि चयन हुने क्रममा पार्टीका सक्रिय १९ सदस्यबीच कडा प्रतिस्पर्धा देखिएको छ।
निर्वाचन प्रणाली अनुसार युवातर्फ १ जना, महिलातर्फ २ जना र खुल्लातर्फ ३ जना प्रतिनिधि चयन हुनेछन्।
युवातर्फ नरेशप्रसाद चुडाल, हरिकृष्ण अधिकारी, दोणविक्रम कोइराला, दुर्गाबहादुर वन र अग्निप्रसाद सापकोटा उम्मेदवार रहेका छन्। हल्दीबारी गाउँपालिका का चुडाल र अधिकारी र १२दशी गाउँपालिका का सापकोटा बीच युवा प्रतिनिधि पदका लागि कडा प्रतिस्पर्धा हुने देखिएको छ। चुडाल नेकपा एमाले क्षेत्रीय कमिटीका सचिव हुन् भने अधिकारी हल्दीबारी गाउँ कमिटी सचिव र सापकोटा बारादशी गाउँ कमिटी अध्यक्ष हुन्।
महिलातर्फ शान्तादेवी खरेल, कल्पना रेग्मी र कौशल्य दाहाल अधिकारीबीच प्रतिस्पर्धा हुने अपेक्षा गरिएको छ। खरेल बाह्र गाउँपालिका उपाध्यक्ष हुन् भने रेग्मी हल्दीबारीकी लोकप्रिय महिला नेता हुन्। अधिकारी भद्रपुर नगरपालिकाकी महिला नेता हुन् र यसअघि पनि महाधिवेशन प्रतिनिधि भइसकेकी छिन्।
खुल्लातर्फ ११ उम्मेदवार प्रतिस्पर्धा गरिरहेका छन्। हल्दीबारीबाट प्रदेशसभा सदस्य छविलाल चुडाल, गाउँ कमिटी अध्यक्ष त्रीलोचन सापकोटा, प्रदेश कमिटी सदस्य सन्तलाल मेचे र मोहनचन्द्र रेमीको उम्मेदवारी कायमै छ।
त्यसैगरी युवाहरू बीच लोकप्रिय बसन्त बानिया, पूर्व शिक्षक कृष्ण बिमली, तिलबहादुर राई, लक्ष्मण पाठक, वीरेन्द्र राजवंशी, शिव कुमार राजभण्डारी र पत्रकार माधव विद्रोहीले पनि खुल्लातर्फ उम्मेदवारी दिएका छन्।
निर्वाचन समितिले जनाएको छ कि खुल्लातर्फ उम्मेदवारी दिएको १३ जनामध्ये दुई जनाले फिर्ता लिएका छन्। महिलातर्फ र युवातर्फ पनि दुई-दुई जना उम्मेदवारी फिर्ता भएका छन्।
झापा क्षेत्र नम्बर ३ का १४ वटा मतदान केन्द्रमा भोलि बिहान ९ बजेदेखि मतदान सुरु हुनेछ। मतगणना नेपाल रेडक्रस सोसाइटी हल्दीबारी उपशाखाको सभा हलमा दिउँसो सम्पन्न हुनेछ।
नेकपा एमालेले निर्वाचन सञ्चालन गर्न अधिवक्ता दिपेन्द्र भट्टराई संयोजक रहेको निर्वाचन समितिलाई जिम्मेवारी दिएको छ। समितिका अन्य सदस्यहरूमा रेणुका भुर्तेल, जीवन खरेल, हरि गौतम, कुलबहादुर कार्की रहेका छन् भने प्राविधिक प्रमुखमा विगम श्रेष्ठ नियुक्त छन्।
