ल्याटिन अमेरिकासँगैको जलक्षेत्रमा अमेरिकी विमानवाहक युद्धपोत यूएसएस जेराल्ड आर फोर्ड को आगमनले अमेरिका र भेनेजुएलाबीचको तनाव नयाँ मोडमा पुर्याएको छ। यो सन् १९८९ मा पानामामा अमेरिकी आक्रमणको समयपछि उक्त क्षेत्रमा अमेरिकाको सबैभन्दा ठूलो सैन्य परिचालन मानिएको छ।
तीन दशकअघि म्यान्वेल नोरिएगालाई लागुपदार्थ तस्करीको आरोप लगाइएको थियो भने अहिले भेनेजुएलाका राष्ट्रपति निकोलास मदुरो माथि पनि यस्तै आरोप लागेका छन्। मदुरोले ती सबै आरोपलाई पूर्ण रूपमा अस्वीकार गरेका छन्।
विश्वकै सबैभन्दा ठूलो र अत्याधुनिक विमानवाहक युद्धपोतलाई भेनेजुएलाको छेवैमा खटाएको भए पनि वाशिङ्टनले आफ्नो उद्देश्य स्पष्ट गरेको छैन। तर कराकसले सबैभन्दा खराब परिस्थितिको सामना गर्न तयारी सुरु गरेको देखिन्छ।
अमेरिकी राष्ट्रपति डोनल्ड ट्रम्प ले मदुरोलाई सत्ता छोड्न दबाब दिएको बताएका छन् र जतिसुकै बेला आक्रमण हुन सक्ने चेतावनी दिएका छन्। भेनेजुएलाका रक्षामन्त्री भ्लादिमिर पाद्रिनो लोपेज ले स्थल, समुद्री, हवाई, नदी र क्षेप्यास्त्र सैन्य बललाई नागरिक मिलिसियासहित देशभर व्यापक रूपमा खटाउने घोषणा गरेका छन्।
विशेषज्ञहरूको मत अनुसार, भेनेजुएलाको सेना र मिलिसियाको क्षमता सीमित छ। आईआईएसएस अनुसार देशमा १ लाख २३ हजार सक्रिय सैनिक, २ लाख २० हजार मिलिसियाका सदस्य र ८ हजार जगेडा सैनिक छन्। धेरैजसो सैनिकले पर्याप्त प्रशिक्षण पाएका छैनन् र मिलिसियाका धेरै सदस्यसँग हतियार समेत छैन।
मदुरोले रूसबाट प्राप्त सुखोई लडाकु विमान, चीन निर्मित बख्तरबन्द सवारी साधन र इरानी ड्रोनहरूको प्रदर्शन गरेका छन्। तर अन्तर्राष्ट्रिय विश्लेषकहरूले भेनेजुएलाको दाबी र वास्तविक क्षमताबीच ठूलो अन्तर रहेको बताएका छन्।
विशेषज्ञहरूले बताउँछन् कि मदुरो र उनका सहयोगी ‘गुरिल्ला युद्ध’को तयारीमा छन्, तर आम नागरिक र सैनिकहरूको समर्थन सीमित छ। अमेरिकासँग प्रत्यक्ष द्वन्द्वमा भेनेजुएलाले ठूलो खतरा पुर्याउन सक्ने अवस्था अहिले छैन। बिबिसी न्युजका आधारमा
