पाँच पटकको च्याम्पियन ब्राजिल अमेरिकामा जारी फिफा विश्वकप २०२६ को नकआउट (अन्तिम १६) चरणमा प्रवेश गरेको छ। ह्युस्टन स्टेडियममा मंगलबार सम्पन्न अत्यन्तै प्रतिस्पर्धात्मक खेलमा ब्राजिलले बलियो एसियाली प्रतिद्वन्द्वी जापानलाई २–१ गोल अन्तरले पराजित गरेको हो।
मध्यान्तरसम्म १–० ले पछि परेको ब्राजिलले दोस्रो हाफमा उत्कृष्ट पुनरागमन गर्दै खेल आफ्नो पक्षमा पार्न सफल भयो। ब्राजिलको जितमा इन्जुरी समयको पाँचौँ मिनेटमा वैकल्पिक खेलाडी ग्याब्रिएल मार्टिनेलीले गरेको गोल नै निर्णायक बन्यो।
खेलको २९ औँ मिनेटमा काइसु सानोले लामो दूरीबाट उत्कृष्ट गोल गर्दै जापानलाई सुरुवाती अग्रता दिलाएका थिए। तर, दोस्रो हाफको ५६ औँ मिनेटमा ब्राजिलका अनुभवी मिडफिल्डर कासेमिरोले हेडमार्फत गोल गर्दै खेललाई बराबरीमा ल्याए। यस गोलसँगै ३४ वर्षीय कासेमिरो विश्वकपमा गोल गर्ने ब्राजिलका दोस्रो बढी उमेरका खेलाडी समेत बनेका छन्। निर्धारित ९० मिनेटको खेल बराबरीमा सकिएपछि थपिएको इन्जुरी समयमा मार्टिनेलीले गोल गरेपछि जापानको विश्वकप यात्रा समाप्त भएको छ। अब क्वार्टरफाइनल प्रवेशका लागि ब्राजिलले आइभोरी कोस्ट र नर्वेबीचको विजेतासँग प्रतिस्पर्धा गर्नेछ।
