अभिषेक खतिवडा / हल्दिबारी (झापा) । नेपालका प्रथम जननिर्वाचित प्रधानमन्त्री एवं नेपाली कांग्रेसका संस्थापक नेता विश्वेश्वरप्रसाद (बीपी) कोइरालाको स्मरणमा हल्दिबारीमा वृक्षरोपण कार्यक्रम गरी बीपी स्मृति दिवस मनाइएको छ।
नेपाली कांग्रेस हल्दिबारी गाउँ कार्यसमितिको आयोजनामा मंगलबार आयोजित कार्यक्रममा अमला, भाइरल सिरिस, आँपलगायत विभिन्न २० प्रजातिका बिरुवा रोपिएको हो।
गाउँ समितिका सभापति गङ्गा प्रसाईंको सभापतित्वमा भएको वृक्षरोपण कार्यक्रममा नेपाली कांग्रेसका क्षेत्रीय सभापति एवं भद्रपुर नगरपालिकाका प्रमुख गणेश पोख्रेल प्रमुख अतिथि रहेका थिए।
कार्यक्रममा झापा क्षेत्र नं. ३ का कांग्रेस नेता राजेन्द्र घिमिरे, नेपाल महिला संघ झापा क्षेत्र नं. ३ की अध्यक्ष उर्मिला गौतमलगायत जिल्ला तथा गाउँ कार्यसमितिका पदाधिकारी, नेता एवं शुभेच्छुकहरूको बाक्लो उपस्थिति थियो।
सम्बोधनका क्रममा सभापति प्रसाईंले बीपीको विचार, आदर्श र योगदानबाट प्रेरणा लिँदै वातावरण संरक्षण तथा सामाजिक उत्तरदायित्व निर्वाह गर्ने उद्देश्यले वृक्षरोपण गरिएको बताए।
सोही कार्यक्रमका बीच जनता समाजवादी पार्टी (जसपा), नेपालका स्थानीय नेता ध्रुव श्रेष्ठ नेपाली कांग्रेसमा प्रवेश गरेका छन्। २०७९ को प्रदेशसभा निर्वाचनमा झापा क्षेत्र नं. ३ (ख) बाट उम्मेदवार बनेका पूर्वशिक्षक श्रेष्ठलाई खादा ओढाएर पार्टीमा स्वागत गरिएको थियो।
कांग्रेस क्षेत्रीय सचिव भूपाल बस्नेतले सञ्चालन गरेको उक्त कार्यक्रममा स्थानीय कांग्रेस समर्थक एवं शुभेच्छुकहरूको उपस्थिति रहेको थियो।
