हल्दिबारी ,झापा । झापाको हल्दीबारी गाउँपालिका–२ स्थित सरस्वती आधारभूत विद्यालयका पूर्वविद्यार्थीहरूले आफ्ना दिवङ्गत बुबाको स्मृति र आमाको सम्मानमा ३ लाख रुपैयाँको अक्षयकोष स्थापना गरेका छन्।
हल्दीबारी–२ पाराखोपी निवासी स्वर्गीय टेकबहादुर चम्लागाईंको स्मृति तथा आमा भोलादेवी चम्लागाईंको सम्मानमा उनीहरूका छोराछोरीले उक्त कोष स्थापना गरेका हुन्। विद्यालयमा आयोजित एक कार्यक्रमका बीच पूर्वविद्यार्थीहरू ज्ञानेन्द्रकुमार चम्लागाईं र फडेन्द्रकुमार चम्लागाईंले ३ लाख रुपैयाँको चेक विद्यालयका प्रधानाध्यापक गोविन्द बोहरालाई हस्तान्तरण गरे।
आफूहरूले कक्षा १ देखि ५ सम्म सोही विद्यालयमा अध्ययन गरेको र स्वर्गीय पिताले जीवनभर विद्यालयको शैक्षिक सुधारमा पुर्याएको योगदानको कदर गर्दै अक्षयकोष खडा गरिएको उनीहरूले बताए।
अक्षयकोषबाट प्राप्त हुने ब्याजबाट प्रत्येक वर्ष कक्षा ६ देखि ८ सम्म अध्ययनरत उत्कृष्ट ६ जना विद्यार्थी (प्रत्येक कक्षाका एक छात्र र एक छात्रा) लाई दामासाहीका दरले छात्रवृत्ति वितरण गरिने विद्यालय प्रशासनले जनाएको छ।
यसअघि चम्लागाईं परिवारका छोरीहरू मुनादेवी चम्लागाईं (थापा), चम्पादेवी चम्लागाईं (ओली) र माया चम्लागाईं (थापा) समेतको संयुक्त सहयोगमा आफूहरूले माध्यमिक तह अध्ययन गरेको हल्दीबारी माध्यमिक विद्यालयमा ५ लाख रुपैयाँको अक्षयकोष स्थापना गरिसकेका छन्।
मातापिताको स्मृति र सम्मानमा दुवै विद्यालय गरी कुल ८ लाख रुपैयाँको अक्षयकोष खडा गरेर चम्लागाईं परिवारले शिक्षाप्रतिको आफ्नो अगाध लगाव र सामाजिक उत्तरदायित्वको उत्कृष्ट नमुना प्रस्तुत गरेका छन्।
