झापा । प्राकृतिक विपत्तिका कारण अस्तव्यस्त बनेका देशका विभिन्न भागमा नेपाली सेना पुनः एकपटक अग्रपंक्तिमा उभिएर सर्वसाधारणको ‘जीवन्त सहारा’ बनेको छ। रसुवा र नुवाकोट लगायतका क्षेत्रमा भोटेकोशी र त्रिशूली नदीमा आएको विनाशकारी बाढीका बीच जटिल भौगोलिक बनावट र प्रतिकूल मौसमको प्रवाह नगरी सेनाको टोलीले खोज, उद्धार र राहत कार्यलाई तीव्रता दिएको छ।
सैनिक जनसम्पर्क तथा सूचना निर्देशनालयका अनुसार भदौ २४ गते साँझ ६:३० बजेसम्मको तथ्याङ्कले सेनाको अथक प्रयासको प्रष्ट चित्र प्रस्तुत गर्छ। विकट क्षेत्रहरूमा अड्किएका सर्वसाधारणलाई हवाई साधनमार्फत उद्धार गर्ने क्रममा आजै मात्र ८१ जनाको सकुशल उद्धार गरिएको छ। यससँगै हालसम्म सेनाले ४ हजार ८१ जना (३,७९८ स्वदेशी र २८३ विदेशी) नागरिकलाई मृत्युको मुखबाट बाहिर निकालेर सुरक्षित स्थानमा पुर्याइसकेको छ।
गहिरो सुरुङ, लेदो र खतरनाक चट्टानी संरचनाभित्र छिरेर उद्धार कार्य चलाउनु आफैँमा जोखिमपूर्ण छ। तर, नेपाली सेनाका तालिमप्राप्त खोज तथा उद्धार टोलीहरू रसुवागढी, भोटेकोशी, लाङटाङ, चिलिमे, माथिल्लो त्रिशूली-१, त्रिशूली-३ ‘ए’ र ३ ‘बी’ जस्ता जटिल जलविद्युत आयोजनाका टनेलहरूमा निरन्तर खटिरहेका छन्। चिलिमे र माथिल्लो त्रिशूली जस्ता स्थानमा विदेशी टोलीसँग समन्वय गर्दै आधुनिक ‘अवटा ड्रोन’ (AVATA Drone) र ‘थर्मल ड्रोन’ (Thermal Drone) प्रयोग गरी जोखिमपूर्ण खोजी अभियान जारी राखिएको छ। बाटो खोल्न चट्टान ब्लास्टिङ गर्नेदेखि ११ मिटर गहिराइसम्म पुगेर उत्खनन गर्नेसम्मका कठिन कार्यमा सेना पछि हटेको छैन।
खोजी र उद्धारमा मात्रै नभई भौतिक पूर्वाधार पुनःनिर्माणमा पनि सेनाको इन्जिनियरिङ फौज उत्तिकै सक्रिय छ। नुवाकोटको देवीघाटस्थित तादी नदीमा सम्पर्क विच्छेद भएका बस्तीहरूलाई पुनः जोड्न सेनाका ५५ जना इन्जिनियरिङ फौजले बेली ब्रिज (पुल) निर्माण कार्यलाई तीव्र बनाएका छन्।
स्वास्थ्य उपचार र मानवीय सहायतामा पनि सैनिक सेवा उत्तिकै प्रशंसनीय छ। त्रिशूली र धुन्चेमा स्थापना गरिएका आपत्कालीन उपचार केन्द्र र मेडिकल गस्तीमार्फत आज २४ जनासहित हालसम्म ३ हजार ५ सय ५९ जना घाइते तथा बिरामीहरूले नि:शुल्क स्वास्थ्य सेवा प्राप्त गरिसकेका छन्।
काठमाडौँदेखि चितवन र नवलपरासीसम्मको विशाल प्रभावित क्षेत्रमा अहिले नेपाली सेनाका ८ हजार ८ सयभन्दा बढी फौज प्रत्यक्ष रूपमा मैदानमा छन्। घाइतेको उद्धार, शव व्यवस्थापन, राहत सामग्री वितरण, अवरुद्ध सडक तथा पुल सञ्चालन जस्ता बहुआयामिक जिम्मेवारी सेनाले एकसाथ कुशलतापूर्वक निभाइरहेको छ।
जस्तोसुकै कठिन परिस्थिति र भौगोलिक चुनौतीमा पनि नागरिकको जिउधनको रक्षाका लागि आफ्नो ज्यान जोखिममा राखेर खटिने नेपाली सेनाको यो कार्यकुशलता र समर्पणले सम्भावित ठूलो जनधनको क्षतिलाई रोक्न सफल भएको छ। देशका सच्चा रक्षकका रूपमा नेपाली सेनाले पुनः एकपटक देश र जनताप्रतिको आफ्नो निस्वार्थ निष्ठा सिद्ध गरेको छ।
