भान्सा तथा बाथरुममा देखिने साङ्लो (ककरोच) ले फोहोर फैलाउनुका साथै विभिन्न रोगहरूसमेत निम्त्याउने गर्छन्। बजारमा पाइने महँगा स्प्रे वा औषधि प्रयोग गर्दा पनि साङ्लोबाट छुटकारा पाउन नसकिएको अवस्थामा सेफ रूपम सेहत्याले एउटा उपयोगी घरायसी उपाय साझा गरेका छन्। महिनामा २ पटक मात्र प्रयोग गर्दा यसले प्रभावकारी काम गर्छ।
आवश्यक सामग्रीहरू :
बोरिक एसिड पाउडर: १०० ग्राम
गहुँको पिठो: २ देखि ३ ठूलो चम्चा
पिधेको चिनी: १ देखि २ ठूलो चम्चा
दूध: आवश्यकता अनुसार
कसरी काम गर्छ यो विधि?
यस मिश्रणमा प्रयोग हुने प्रत्येक सामग्रीको आफ्नै भूमिका हुन्छ:
चिनी र दूध: यसको मीठो र दुधिलो बास्नाले साङ्लोलाई आफूतिर आकर्षित गर्छ।
गहुँको पिठो: मिश्रणलाई बाक्लो र अडिने बनाउँछ।
बोरिक एसिड: साङ्लोका लागि यो सुस्त विष (स्लो पोइजन) सरह हुन्छ। यसको सेवन वा सम्पर्कले गर्दा डिहाइड्रेसन र पाचन प्रणाली खराब भई साङ्लोहरू नष्ट हुन्छन्।
बनाउने र प्रयोग गर्ने तरिका :
१. मिश्रण तयार पार्ने: एउटा सफा भाँडोमा १०० ग्राम बोरिक एसिड, २-३ चम्चा गहुँको पिठो र १-२ चम्चा पिधेको चिनी हालेर सुख्खा रूपमै राम्ररी मिसाउनुहोस्।
२. दूध थपेर मुस्ने: अब यसमा थोरै-थोरै गर्दै दूध हाल्नुहोस् र मुसेर बाक्लो लेदो वा पिठोको ढिँडो जस्तो बनाउनुहोस्।
३. सेट हुन दिने: यो मिश्रणलाई २० देखि ३० मिनेटसम्म ढाकेर राख्नुहोस्।
४. गोली बनाउने: आधा घण्टापछि हातमा थोरै सुख्खा पिठो लगाएर यस मिश्रणका साना-साना गोलीहरू बनाउनुहोस्।
५. उपयुक्त ठाउँमा राख्ने: यी गोलीहरूलाई साङ्लो धेरै आउने ठाउँहरूमा राख्नुहोस्—
भान्साको सिङ्कमुनि र नालीवरपर
ग्यास चुलो र क्याबिनेटका भित्री कुनाहरूमा
फ्रिज र माइक्रोवेभको पछाडिपट्टि
फोहोर फाल्ने बाकस (डस्टबिन) वरपर र बाथरुमका कुनामा
असर र नतिजा :
यो उपायले २४ देखि ७२ घण्टाभित्र असर देखाउन थाल्छ। चिनी र दूधको लोभमा जब साङ्लोले यो मिश्रण खान्छन् वा यसको सम्पर्कमा आउँछन्, तब तिनीहरू प्रभावित हुन्छन्। आफ्नो बासस्थानमा फर्किएपछि अन्य साङ्लोहरू पनि यसको सम्पर्कमा आएर नष्ट हुन थाल्छन्। २ देखि ३ दिनभित्र साङ्लोहरूको सङ्ख्यामा ठूलो कमी आउँछ।
सावधानी र सुरक्षाका नियम:
बालबालिका र पाल्तु जनावर: बोरिक एसिड कीटनाशक भएकाले यी गोलीहरूलाई बालबालिका र घरका घरपालुवा जनावरको पहुँचभन्दा टाढा राख्नुहोस्।
ग्लभ्सको प्रयोग: मिश्रण बनाउँदा हातमा पन्जा (ग्लभ्स) लगाउनुहोस्।
खाना र भाँडाकुँडा: यो मिश्रणलाई खुला खानेकुरा वा पकाउने/खाने भाँडाकुँडाको सोझो सम्पर्कमा आउन नदिनुहोस्।
