नेपालको स्वयंसेवी रक्तदान अभियानका अभियन्ता एवं ‘रक्तदाता सम्राट’ प्रेमसागर कर्माचार्यले १८७ औँ पटक रक्तदान गरेर नयाँ कीर्तिमान कायम गरेका छन्। नेपाल स्वयंसेवी रक्तदाता समाजका केन्द्रीय अध्यक्ष कर्माचार्यले कर्णाली प्रदेशको विकट मुगु जिल्ला शाखा गठनको भव्य कार्यक्रमका बीच आफ्नो जीवनको १८७ औँ स्वयंसेवी रक्तदान सम्पन्न गरेका हुन्। नेपाल सरकारले हालै मात्र कर्माचार्यलाई नेपाल रेडक्रस सोसाइटीको केन्द्रीय कोषाध्यक्षको महत्वपूर्ण जिम्मेवारी समेत सुम्पिएको छ।
‘रगतको विकल्प केवल रगत नै हो र एक पिन्ट रगतले कसैको अमूल्य जीवन बचाउन सक्छ’ भन्ने मूल मन्त्रलाई आत्मसात् गर्दै उनले मात्र १६ वर्षको उमेरदेखि यो मानवीय यात्रा सुरु गरेका थिए। आधा शताब्दीभन्दा बढी समयदेखि निरन्तर रूपमा हरेक तीन–तीन महिनामा रक्तदान गर्दै आएका उनी नेपालमा सबैभन्दा बढी पटक रगत दान गर्ने अग्रणी व्यक्तित्व हुन्।
मुगु जस्तो दुर्गम भूगोलमा पुगेर समाजको नयाँ जिल्ला शाखा विस्तार गर्नुका साथै कर्माचार्य आफैँले रक्तदान गरेर स्थानीय समुदायलाई यस परोपकारी कार्यमा लाग्न प्रेरित गरेका छन्। रेडक्रसको नयाँ जिम्मेवारी सम्हालेका कर्माचार्यको यो निरन्तर निष्काम सेवा र उच्च प्रतिबद्धतालाई सामाजिक क्षेत्रमा मानवताको एउटा उत्कृष्ट उदाहरणका रूपमा हेरिएको छ। ऐतिहासिक उपलब्धिको यस अवसरमा विभिन्न संघ–संस्था र शुभेच्छुकहरूले उनलाई बधाई तथा शुभकामना व्यक्त गरेका छन्।
