झापा । राष्ट्रिय विपद् जोखिम न्यूनीकरण तथा व्यवस्थापन प्राधिकरण (NDRRMA) ले रसुवामा आएको विनाशकारी बाढी तथा पहिरोको पछिल्लो अद्यावधिक विवरण सार्वजनिक गरेको छ। २०८३ भदौ २२ गते बिहान ११:०० बजेसम्मको तथ्याङ्कअनुसार बाढी र पहिरोका कारण १,३५५ जनाले ज्यान गुमाएका छन्। जसमध्ये रसुवामा १६९, नुवाकोटमा १९७, धादिङमा ७०, गोरखामा ७५, तनहुँमा ३८, चितवनमा ३६३, नवलपरासी पूर्वमा २२२ र नवलपरासी पश्चिममा २२१ जनाको मृत्यु भएको छ। प्रभावित क्षेत्रहरूबाट हालसम्म ९८ जनाको मात्र सनाखत भई शव आफन्तलाई बुझाइएको प्राधिकरणले जनाएको छ।
बाढी तथा पहिरोका कारण अझै पनि करिब ४,९९६ जना सम्पर्कविहीन रहेका छन्। बेपत्ता हुनेहरूमा रसुवाका १,९६७, नुवाकोटका २,३४०, सुरक्षाकर्मी तथा कर्मचारी करिब १०० र विदेशी नागरिक करिब ५८९ जना रहेका छन्। विपद् क्षेत्रमा खोज, उद्धार तथा सुरक्षाका लागि नेपाल प्रहरीका ७,९१२, नेपाली सेनाका ९,२८७ र सशस्त्र प्रहरी बलका ४,२०३ गरी कुल २१,४०२ जना सुरक्षाकर्मी परिचालन गरिएको छ। सुरक्षाकर्मी र उद्धार टोलीको प्रयासमा हालसम्म १३,३९६ जनाको जीवितै उद्धार गरिएको छ भने ६,६७२ जना घाइतेको उपचार भइरहेको छ। प्रभावितहरूका लागि ३९ वटा होल्डिङ सेन्टरमा ३,५३३ जनालाई आश्रय दिइएको छ।
उद्धार तथा राहत सामग्री ढुवानीका लागि नेपाली सेनाले १,१५७ पटक, निजी क्षेत्रले १२९ पटक र सशस्त्र प्रहरी बलले १९३ पटक हवाई उडान गरेका छन्। भदौ २१ गते रसुवामा हेलिकप्टर र ४ वटा ट्रक थप राहत सामग्री, जेनेरेटर, हाइजिन किट र स्टुडेन्ट किटसहित पठाइएको थियो। राहत कोषबाट सरकारले रसुवा र नुवाकोटलाई १–१ करोड, धादिङलाई ५० लाख र प्रभावित १५ पालिकालाई कुल १३ करोड ५० लाख रुपैयाँ नगद राहत विनियोजन गरिसकेको छ।
क्षेत्रगत पूर्वाधारको स्थिति हेर्दा नेपाल टेलिकमका १२० मध्ये ११७ टावर र एनसेलका ७८ मध्ये ७६ टावर पुनः सञ्चालनमा आइसकेका छन्। त्यसैगरी विद्युत् आपूर्तितर्फ रसुवामा ७८ प्रतिशत, नुवाकोटमा ९६.७ प्रतिशत र धादिङमा ९९.८ प्रतिशत घरधुरीमा बिजुली सुचारु भएको छ। प्रभावित क्षेत्रमा ५८ हजार लिटर डिजेल, २५ हजार लिटर पेट्रोल, १३ हजार लिटर हवाई इन्धन र ४५७ ग्यास सिलिन्डर अनुदानमा उपलब्ध गराइएको छ।
(स्रोतः गृह मन्त्रालय, राष्ट्रिय विपद् जोखिम न्यूनीकरण तथा व्यवस्थापन प्राधिकरण)
