हल्दीबारी (झापा) । हल्दीबारीस्थित ध्रुवतारा बहुउद्देश्य विद्युत सहकारी संस्था लिमिटेडको आठौँ वार्षिक साधारण सभा बिहीबार भव्य रूपमा सम्पन्न भएको छ।
संस्थाका अध्यक्ष भानुभक्त प्रसाईंको अध्यक्षता एवं कोशी प्रदेश सभा सदस्य माननीय छविलाल चुडालको प्रमुख आतिथ्यमा साधारण सभा सम्पन्न भएको हो।
साधारण सभाको उद्घाटन सत्रलाई सम्बोधन गर्दै प्रमुख अतिथि प्रदेश सभा सदस्य छविलाल चुडाल, हल्दीबारी गाउँपालिकाका प्रमुख प्रशासकीय अधिकृत मानबहादुर वन (महेन्द्र), हल्दीबारी वडा नम्बर ४ का वडाध्यक्ष सन्तकुमार थापा, वडा नम्बर ५ का वडाध्यक्ष खड्ग लावती, विद्युत उपभोक्ता महासङ्घका केन्द्रीय सदस्य चेतराज भट्टराई तथा जिल्ला अध्यक्ष चन्द्र तामाङ लगायतले शुभकामना मन्तव्य व्यक्त गरेका थिए।
प्रमुख प्रशासकीय अधिकृत वनलाई बिदाइ सम्मान
सोही समारोहका बिच हल्दीबारी गाउँपालिकामा ३८ महिनासम्म रहेर प्रशासनिक क्षेत्रमा उल्लेखनीय योगदान पुर्याएको भन्दै गाउँपालिकाका प्रमुख प्रशासकीय अधिकृत मानबहादुर वनलाई ‘फेरि भेटौँला’ कार्यक्रमअन्तर्गत विशेष सम्मानसहित बिदाइ गरिएको छ।
त्यसैगरी, नियमित रूपमा विद्युत महसुल बुझाएर संस्थालाई सहयोग पुर्याउने चार जना उपभोक्तालाई पनि नगदसहित सम्मान गरिएको छ। सम्मानित हुनेहरूमा सिरुवाल राइस मिल, पुणी मेचे, तुलसा कँडेल र विष्णुप्रसाद पराजुली रहेका छन्।
सिँचाइमा ७५ प्रतिशत अनुदान र सडक बत्ती सम्झौता
कृषि उत्पादनलाई प्रोत्साहन गर्ने उद्देश्यले वडा नम्बर ५ भित्रका उपभोक्ताहरूलाई ‘सिंगल फेज’ सिँचाइमा ७५ प्रतिशत अनुदान दिने गरी वडा कार्यालयसँग सहमति भएको साधारण सभामा जानकारी दिइयो। यस्तै, सडक बत्तीको महसुल व्यवस्थापनका लागि वडा नं. ५ को कार्यालयसँग ७०/३० को साझेदारी कार्यक्रमअन्तर्गत सम्झौता गरी काम भइरहेको जनाइएको छ।
भवन निर्माणका लागि जग्गा र १० लाख बजेट
संस्थाको आफ्नै भवन निर्माणका लागि स्थानीय युवा व्यवसायी तथा समाजसेवी रुद्र उप्रेतीले आफ्ना स्वर्गीय पिताको स्मृतिमा १५ धुर जग्गा नि:शुल्क उपलब्ध गराएका छन्। साथै, प्रदेश सांसद छवि चुडालको पहलमा कोशी प्रदेश सरकारबाट भवन निर्माणका लागि रु. १० लाख बजेट विनियोजन भएको जानकारी गराइयो।
वि.सं. २०६० सालमा स्थापना भई ग्रामीण क्षेत्रमा विद्युतीकरण गर्दै आएको यस संस्थामा हाल हल्दीबारीका वडा नम्बर २, ३, ४ र ५ का गरी कुल १ हजार ७ सय ८० जना उपभोक्ता आबद्ध छन्। ८०/२० को कार्यक्रमअनुसार हालसम्म १२ वटा ट्रान्सफर्मरमार्फत विद्युत सेवा दिइरहेको संस्थामा चार जना कर्मचारी कार्यरत छन्।
कार्यक्रममा कोषाध्यक्ष नविन मैनालीले आर्थिक प्रतिवेदन र अध्यक्ष प्रसाईंले अध्यक्षको प्रतिवेदन प्रस्तुत गरेका थिए। प्रस्तुत दुवै प्रतिवेदनलाई साधारण सभाले सर्वसम्मत रूपमा पारित गरेको संस्थाका सचिव ओमराज राईले जानकारी दिए।
उपाध्यक्ष धनकुमारी गुरुङले स्वागत मन्तव्य राखेको उक्त कार्यक्रमको सञ्चालन भने सचिव ओमराज राई ले गरेका थिए।
