वरतलाल राजवंशी । कुमरखोद, कार्तिक ३
विजयादशमीको अवसरमा झापा गाउँपालिका–७ स्थित मदरगाछ बजारमा आगामी कार्तिक ४ गते (टीकाका दिन) भव्य दसैँ मेला आयोजना हुने भएको छ।
मेला समितिका अध्यक्ष पृथ्वी देवानका अनुसार स्थानीय कला र संस्कृतिको प्रवर्द्धन गर्ने उद्देश्यले आयोजना गर्न लागिएको मेलामा सन्थाल नृत्य प्रतियोगिता, विविध सांस्कृतिक झाँकी तथा रावण दहन मुख्य आकर्षणका रूपमा रहनेछन्।
प्रतियोगितात्मक रूपमा सञ्चालन गरिने सन्थाल नृत्यमा प्रथम हुने टोलीलाई रु ४१ हजार १००, दोस्रो हुनेलाई रु २५ हजार १०० र तेस्रो हुनेलाई रु १५ हजार १०० नगद पुरस्कार प्रदान गरिनेछ। प्रतियोगितामा सहभागी अन्य सबै टोलीलाई पनि प्रोत्साहनस्वरूप सान्त्वना पुरस्कारको व्यवस्था गरिएको अध्यक्ष देवानले जानकारी दिए।
त्यस्तै असत्यमाथि सत्यको विजयको प्रतीकका रूपमा मेलाकै अवसरमा विशाल रावणको पुतला निर्माण गरी दहन गरिने कार्यक्रम रहेको मेला समितिका सचिव भुपेन्द्र थापाले बताए।
वर्षौँदेखि चल्दै आएको परम्परागत मेलाले स्थानीय सांस्कृतिक पहिचान जोगाउनुका साथै विभिन्न समुदायबीच आपसी सद्भाव, एकता र भाइचारा अभिवृद्धि गर्न सहयोग पुर्याउने अपेक्षा आयोजकको छ। मेला समितिले झापा र आसपासका सम्पूर्ण सर्वसाधारणलाई उपस्थितिका लागि हार्दिक आह्वान गरेको छ।
