ढाका (बङ्गलादेश) — नेपालको प्राकृतिक सुन्दरता र सांस्कृतिक विविधता समेटिएका तस्बिरहरू बङ्गलादेशको राजधानी ढाकामा प्रदर्शित गरिएका छन् । राष्ट्रिय फोटो पत्रकार समूह (एनएफपिजे) नेपाल र बङ्गलादेश फोटो जर्नालिस्ट्स एसोसिएसन (बीपीजेए) को संयुक्त आयोजनामा ‘सुन्दर नेपाल’ शीर्षकको फोटो प्रदर्शनी बिहीबार सम्पन्न भएको हो ।
नेपाल र बङ्गलादेशबीचको ‘मित्रता र भाइचाराको २१ वर्ष’ पुगेको अवसरमा आयोजित प्रदर्शनीको उद्घाटन बङ्गलादेशी वरिष्ठ पत्रकार हसन हफिजले गरेका थिए । कार्यक्रममा प्रमुख अतिथिका रूपमा उपस्थित ढाकाका प्रदेश सूचना मन्त्री यसीर खान चौधरीले नेपाली फोटो पत्रकारहरूको सिर्जनशीलताको प्रशंसा गर्दै यस्ता कार्यक्रमले दुई देशको सम्बन्धलाई जनस्तरसम्म पुर्याउने बताए ।
प्रदर्शनीमा नेपालका हिमाल, पहाड र तराईका जनजीवनका साथै मौलिक परम्परा झल्काउने तस्बिरहरू राखिएका थिए । एनएफपिजेका अध्यक्ष प्रदीपराज वन्तको नेतृत्वमा १० सदस्यीय नेपाली फोटो पत्रकारको टोली ढाका पुगेको हो । “प्रदर्शनीले नेपालको पर्यटन प्रवर्द्धन मात्र नभई दुई देशका फोटो पत्रकारहरूबीच अनुभव र सीप आदान–प्रदान गर्ने वातावरण पनि बनायो,” अध्यक्ष वन्तले कान्तिपुरसँग भने ।
बङ्गलादेशका तस्बिर पारखीहरूले नेपाली हिमाल र कलाकृतिका तस्बिरहरूमा विशेष रुचि देखाएका थिए । कार्यक्रमले आगामी दिनमा दुवै देशका पत्रकारहरूबीच व्यावसायिक सहकार्य र संयुक्त परियोजनाहरू सञ्चालन गर्न मार्ग प्रशस्त गरेको आयोजकले जनाएको छ ।
