झापा, १६ चैत । झापाको मेचिनगरमा एक महिलामाथि जबरजस्ती करणीको प्रयास गरेको अभियोगमा एक वृद्ध पक्राउ परेका छन्। जिल्लाको बिर्तामोड नगरपालिका वडा नम्बर २ निवासी ६२ वर्षीय प्रदिप मित्तललाई प्रहरीले नियन्त्रणमा लिएको हो।
घटना विवरण अनुसार गत चैत ३ गते दिउँसो करिब १:१५ बजेको समयमा मेचिनगर नगरपालिका-१४ स्थित पाथिभरा टोलमा मित्तलले एक महिलालाई जबरजस्ती करणीको प्रयास गरेका थिए। आफूमाथि दुर्व्यवहार भएलगत्तै पीडित महिलाले सोही दिन इलाका प्रहरी कार्यालय धुलाबारीमा पुगेर जाहेरी दरखास्त दिएकी थिइन्।
जाहेरी परेपछि प्रहरीले मित्तलको खोजी कार्य तीव्र पारेको थियो। प्रहरीको खोजी सूचीमा रहेका आरोपित मित्तल आज चैत १६ गते बिहान १०:१५ बजे आफैँ इलाका प्रहरी कार्यालय धुलाबारीमा उपस्थित भएका थिए। कार्यालयमा हाजिर भएसँगै प्रहरीले उनलाई तत्काल नियन्त्रणमा लिएको छ।
पक्राउ परेका मित्तलमाथि मुलुकी अपराध संहिता, २०७४ बमोजिम ‘जबरजस्ती करणी उद्योग’ को कसूरमा कानुनी प्रक्रिया अगाडि बढाइएको छ। उनलाई आजै झापा जिल्ला अदालतमा उपस्थित गराई थप अनुसन्धानका लागि ५ दिनको म्याद लिइएको छ। प्रहरीले घटनाको सम्बन्धमा थप प्रमाण सङ्कलन र आवश्यक अनुसन्धान गरिरहेको जानकारी दिएको छ।
