दमक झापाको गौरादह नगरपालिका–२ स्थित सिटिया टोलमा एक वृद्ध मृत फेला परेका छन्। विगत ७ वर्षदेखि छोरी सविना हस्दाको घरमा बस्दै आएका मोरङको पथरी शनिश्चरे नगरपालिका–५ मौलीबारीका ६० वर्षीय बाबुराम हस्दा मृत फेला परेका हुन्।
आइतबार बेलुकी ४:४५ बजेको समयमा बाटो छेउको पैनी (कुलो) मा हस्दा घोप्टो परेको अवस्थामा स्थानीयबासीले फेला पारेका थिए। स्थानीय चक्रबहादुर राई र शिरुलाल ताजपुरियालगायतले जीवितै हुनसक्ने आशंकामा उनलाई तत्काल पैनीबाट बाहिर निकालेर हेर्दा उनको घटनास्थलमै मृत्यु भइसकेको पाइएको थियो।
घटनाबारे जानकारी पाउनासाथ इलाका प्रहरी कार्यालय दमकबाट प्रहरी अधिकृतको टोली अनुसन्धानका लागि खटिएको थियो। प्रहरी टोलीले साँझ ६:२५ बजे कानुनी प्रक्रिया (मुचुल्का) पूरा गरी शवलाई पोस्टमार्टमका लागि मोरङको उर्लाबारीस्थित मंगलबारे अस्पताल पठाएको छ। घटनाको यथार्थ कारणबारे प्रहरीले अनुसन्धान गरिरहेको जनाएको छ।
