झापा– झापाको हल्दीबारी गाउँपालिकाकी रिदिमा लिम्बूले एजेपी (अबुधाबी जिउ–जित्सु प्रो) अन्तर्राष्ट्रिय जिउ–जित्सु प्रतियोगितामा स्वर्ण पदक जितेकी छन्।
विश्वकै प्रतिष्ठित जिउ–जित्सु संस्था ‘एजेपी’ द्वारा आयोजित उक्त प्रतियोगिताको ‘किड्स–३’ अन्तर्गत ३६ केजी तौल समूहको ‘ग्रे बेल्ट’ विधामा उनले स्वर्ण पदक जितेकी हुन्। उमेर, तौल र बेल्टका आधारमा विश्वभरका खेलाडीहरू सहभागी हुने यस प्रतियोगितामा रिदिमाले नेपाल र आफ्नो गाउँपालिकाको प्रतिनिधित्व गरेकी थिइन्।
हल्दीबारी गाउँपालिका–५ निवासी रिदिमाले फाइनल यात्राका क्रममा संयुक्त अधिराज्य (यूके) र संयुक्त अरब इमिरेट्स (यूएई) का बलिया प्रतिस्पर्धीहरूलाई पराजित गरेकी थिइन्।
विभिन्न देशका प्रतिभाशाली खेलाडीहरूलाई पछि पार्दै स्वर्ण जितेकी रिदिमाको यो सफलताले नेपाली जिउ–जित्सु खेल क्षेत्रको अन्तर्राष्ट्रिय पहिचानलाई थप उचाइमा पुर्याएको छ। उनको यो ऐतिहासिक उपलब्धिप्रति हल्दीबारी गाउँपालिका र झापावासीले खुसी व्यक्त गरेका छन्।
