नरेन्द्र छेत्री /नयाँ दिल्ली, २० जेठ : भारतीय प्रधानमन्त्री नरेन्द्र मोदीले नेपालको राष्ट्रिय स्वतन्त्र पार्टी (रास्वपा)-का अध्यक्ष रवि लामिछानेसँग शिष्टाचार भेटघाट गर्नुभएको छ।
यस भेटघाटपछि प्रधानमन्त्री मोदीले सामाजिक सञ्जालमार्फत खुसी व्यक्त गर्दै अध्यक्ष लामिछानेलाई स्वागत गर्नुभएको छ। उहाँले दुई देशको साझा र समृद्ध भविष्यका लागि मिलेर काम गर्ने लामिछानेको चाहनालाई आफूले पूर्ण रूपमा समर्थन गर्ने र सँगै अघि बढ्न तत्पर रहेको बताउनुभएको छ।
प्रधानमन्त्री मोदीले भारतको ‘छिमेकी पहिलो’ (नेबरहुड फस्ट) नीतिको उल्लेख गर्दै नेपाल भारतको एउटा प्राथमिकतामा रहेको साझेदार देश भएको स्पष्ट पार्नुभएको छ।
उहाँले नेपालको नयाँ सरकारसँग मिलेर दुई देशबीचको विशेष, बहुआयामिक र ऐतिहासिक सम्बन्धलाई अझ नयाँ उचाइमा पुऱ्याउनका लागि भारत सधैं उत्सुक रहेको कुरामा जोड दिनुभएको छ। यस भेटघाटलाई दुई देशबीचको आपसी मित्रता र कूटनीतिक सम्बन्धलाई अझ बलियो बनाउने एउटा महत्त्वपूर्ण कदमको रूपमा हेरिएको छ।
