हल्दिवारी, झापा । झापाको हल्दिवारी-३ स्थित चिल्ड्रेन गार्डेन अङ्ग्रेजी स्कुलले यस वर्षको माध्यमिक शिक्षा परीक्षा (SEE) २०८२ मा उत्कृष्ट नतिजा हासिल गर्दै आफ्नो शैक्षिक गरिमालाई थप उचाइमा पुर्याएको छ। विद्यालयका प्रिन्सिपल दुर्गामणि गौतमका अनुसार यस पटकको परीक्षामा सहभागी ५१ जना विद्यार्थीमध्ये सबैले उच्च अङ्कका साथ सफलता प्राप्त गरेका छन्। विशेषगरी विद्यार्थी रिसब ढुङ्गेलले ३.७५ जिपिए प्राप्त गरी विद्यालय प्रथम हुँदै स्कुलको नाम रोशन गर्न सफल भएका छन्।
नतिजाको विस्तृत विवरण दिँदै प्रिन्सिपल गौतमले विद्यालयका २३ जना विद्यार्थीले ३.२० देखि ३.६० जिपिएको उच्च अङ्क ल्याएको जानकारी दिनुभयो। त्यस्तै, १९ जना विद्यार्थीले २.८० देखि ३.२० जिपिए प्राप्त गरेका छन् भने ८ जना विद्यार्थी २.४० देखि २.८० जिपिए ल्याएर सफलतापूर्वक उत्तीर्ण भएका छन्। समग्रमा सबै ५१ जना परीक्षार्थीहरूले उत्कृष्ट श्रेणीमा सफलता हात पारेका हुन्।
विद्यार्थीहरूको यो गौरवपूर्ण उपलब्धिमा खुसी व्यक्त गर्दै विद्यालयले रिसब ढुङ्गेलसहित उत्तीर्ण सम्पूर्ण विद्यार्थीहरूलाई हार्दिक बधाई ज्ञापन गरेको छ। प्रिन्सिपल गौतमले विद्यार्थीहरूको कडा परिश्रम, शिक्षकहरूको कुशल मार्गदर्शन र अभिभावकहरूको अटुट विश्वासकै कारण यो परिणाम सम्भव भएको बताउँदै सबै सफल विद्यार्थीहरूको उज्ज्वल भविष्य र आगामी शैक्षिक यात्राको उत्तरोत्तर प्रगतिको हार्दिक शुभकामना समेत व्यक्त गर्नुभएको छ।
