शान्ता उप्रेती /हल्दीबारी, झापा ।
झापाको हल्दीबारी गाउँपालिका वडा नम्बर १ मा सञ्चालित सम्स्कारा शिक्षा सदनले विद्यार्थीहरूको व्यावहारिक सीप र आत्मविश्वास अभिवृद्धि गर्ने उद्देश्यका साथ जेठ २९ गते मासिक शैक्षिक मेला सफलतापूर्वक सम्पन्न गरेको छ। विद्यालयको यस विशेष आयोजनमा विशेष गरी कक्षा ६ का विद्यार्थीहरूले आफ्नो सिर्जनशीलता, उद्यमशीलता र प्राविधिक कलाको उत्कृष्ट प्रदर्शन गर्ने अवसर पाएका थिए।
मेलाको मुख्य आकर्षणका रूपमा विद्यार्थीहरूले आफैं पकौडा र पानीपुरी जस्ता स्वादिष्ट खाद्य परिकारहरू तयार पारेर प्रदर्शनीमा राखेका थिए। यसका साथै उनीहरूले दैनिक जीवनमा उपयोगी हुने विभिन्न प्रकारका साबुन, ऊन तथा धागोको प्रयोगबाट बनाइएका कपाल बाँध्ने चिम्टी, रबर, महिला उपयोगी सामग्री र घर सजावटका आकर्षक वस्तुहरू निर्माण गरी आफ्नो व्यावसायिक क्षमता प्रस्तुत गरे। विद्यार्थीहरूको यो बहुमुखी प्रतिभाले मेलामा आएका सबैलाई आकर्षित गरेको थियो।
यसैगरी, मेलामा विद्यार्थीहरूले परम्परागत माटोको चुलो, विज्ञान सम्बन्धी विभिन्न नवप्रवर्तनात्मक नमुना सामग्रीहरू, तथा विश्वकप फुटबल प्रतियोगितामा सामेल भएका देशहरूको झण्डा र कपको मोडेल बनाई प्रदर्शनीमा राखेका थिए। कार्यक्रमको अवलोकनका लागि आमन्त्रित गरिएका कक्षा ६ का अभिभावकहरूले राखेका विभिन्न जिज्ञासा र प्रश्नहरूको विद्यार्थीहरूले प्रस्ट र आत्मविश्वासका साथ उत्तर दिएका थिए। आफ्ना छोराछोरीको यस्तो व्यावहारिक र बौद्धिक प्रस्तुति देख्दा अभिभावकहरू निकै खुसी र उत्साहित देखिएका थिए।
विद्यालयका संस्थापक तथा आयोजक त्रिलोचन भण्डारीले यस्ता कार्यक्रमहरूले विद्यार्थीहरूलाई पाठ्यपुस्तकको सैद्धान्तिक ज्ञानमा मात्र सीमित नराखी उनीहरूमा व्यावहारिक ज्ञान, आत्मनिर्भरता र उद्यमशीलताको भावना विकास गर्न ठूलो टेवा पुग्ने विश्वास व्यक्त गर्नुभयो। विद्यार्थीहरूलाई यस रचनात्मक कार्यमा अगाडि बढाउन विद्यालयका विषय शिक्षकहरूले महत्त्वपूर्ण मार्गदर्शन र सहयोग पुर्याएका थिए।
