संयुक्त राज्य अमेरिकाको Virginia (भर्जिनिया) राज्यस्थित Mantua (मान्टुआ) क्षेत्रमा एक नेपाली मूलका व्यक्तिले आफ्नै परिवारका सदस्यहरूमाथि धारिलो हतियार प्रहार गरेपछि प्रहरीको गोली लागेर ज्यान गुमाएका छन्। घटनामा उनकी श्रीमती र छोरीको मृत्यु भएको छ भने ज्वाइँ गम्भीर घाइते भएका छन्।
Fairfax County Police Department (फेयरफ्याक्स काउन्टी प्रहरी विभाग)का अनुसार बिहान करिब पाँच बजेपछि पर्सिमन सर्कलको ३९०० ब्लकमा घटना भएको हो। गम्भीर घाइते अवस्थामा भेटिएकी छोरीलाई घटनास्थलमै मृत घोषणा गरिएको थियो। श्रीमतीलाई अस्पताल लगिएको भए पनि बिहान नौ बज्नुअघि नै मृत घोषणा गरिएको जनाइएको छ।
प्रहरी प्रमुख Kevin Davis (केभिन डेभिस)ले घटनास्थलमा पुगेका अधिकारीहरूले ती व्यक्तिलाई ज्वाइँमाथि धारिलो हतियार प्रहार गरिरहेको अवस्थामा फेला पारेको बताए। उनलाई पटक–पटक हतियार छोड्न चेतावनी दिइए पनि नमानेपछि एक प्रहरी अधिकारीले गोली चलाएका थिए।
गोली लागेपछि प्रहरीले उनको मुटुको धड्कन फर्काउने प्रयास गरेको थियो। तर उनलाई घटनास्थलमै मृत घोषणा गरिएको जनाइएको छ।
प्रहरीका अनुसार घटना सुरु हुँदा ज्वाइँ घर बाहिर थिए। घरभित्रबाट आवाज आएपछि उनी भित्र प्रवेश गर्दा आफ्नी श्रीमती र सासूमाथि आक्रमण भइरहेको देखेका थिए। ज्वाइँको अवस्था चिन्ताजनक रहेको बताइएको छ।
घरभित्र रहेका करिब एक वर्षका बालक सकुशल फेला परेका छन्। घटनामा प्रयोग गरिएको धारिलो हतियार प्रहरीले बरामद गरेको छ।
प्रहरीले मृतक र घाइतेको पहिचान सार्वजनिक गरेको छैन। गोली लागेर मृत्यु भएका व्यक्ति नेपाली मूलका रहेको पुष्टि गरिएको छ। घटनाबारे अनुसन्धान जारी रहेको प्रहरीले जनाएको छ।
प्रहरी प्रमुखले पचास वर्षभन्दा बढी उमेरका व्यक्तिले आफ्नै परिवारमाथि यस प्रकारको आक्रमण गर्नु “कल्पनाभन्दा बाहिरको” घटना भएको टिप्पणी गरेका छन्। यस घटनाले स्थानीय समुदाय, विशेषगरी नेपाली समुदायलाई स्तब्ध बनाएको बताइएको छ।
