कमल, झापा । झापाको कमल गाउँपालिका–४ स्थित सरस्वती टोलमा सिमेन्ट मुछ्ने मिक्स्चर बोकेको ट्रयाक्टर दुर्घटना हुँदा १० जना घाइते भएका छन्। हिजो बिहान ९ बजे भित्री सडकखण्डमा दमकबाट क्याम्पा बजारतर्फ जाँदै गरेको प्र.१–०१–००१ त ९६९६ नम्बरको ट्रयाक्टर अनियन्त्रित भई मिक्स्चरको भाग सडकबाट तल पल्टिँदा सो दुर्घटना भएको हो।
दुर्घटनामा परी घाइते भएका १० जनाकै दमकका विभिन्न अस्पतालमा उपचार भइरहेको छ। घाइते हुनेहरूमा कमल गाउँपालिकाका चित्रप्रसाद लिखासन, सन्तोष ऋषिदेव, सागर ढुङ्गाना, सुमन नेपाली र गजेन्द्र विक रहेका छन्। त्यस्तै दमक नगरपालिकाका हरि राजवंशी, निमा विश्वकर्मा तथा तराईका जिल्लाहरू बाराका जोखु पासवान, राजदेव साह र रौतहटका जनक साह घाइते भएका छन्। घाइतेहरूको दमक अस्पताल र दमक अस्पताल एन्ड रिसर्च सेन्टरमा उपचार भइरहेको प्रहरीले जनाएको छ।
इलाका प्रहरी कार्यालय दमकले दुर्घटनामा संलग्न ट्रयाक्टर र चालकलाई नियन्त्रणमा लिएको छ। पक्राउ पर्नेमा इलामको चुलाचुली–५ बस्ने २४ वर्षीय भुवन विक रहेका छन्। घटनाको प्रकृति र ट्रयाक्टरको सन्तुलन बिग्रनुको कारणबारे प्रहरीले थप अनुसन्धान गरिरहेको छ।
