झापा ।उच्च अदालत पाटनले मेडिकल व्यवसायी दुर्गा प्रसाईंलाई बैंकिङ कसुरसम्बन्धी मुद्दामा २५ लाख रुपैयाँ धरौटीमा रिहा गर्न आदेश दिएको छ।
सोमबार न्यायाधीशद्वय सुदर्शनदेव भट्ट र मुनेन्द्रप्रसाद अवस्थीको संयुक्त इजलासले धरौटीमा रिहा गर्ने आदेश दिएको हो।
प्रसाईंमाथि नेपाल राष्ट्र बैंकको निर्देशनमा केन्द्रीय अनुसन्धान ब्युरो (सीआईबी)ले अनुसन्धान थालेको थियो। राष्ट्र बैंकले माघ २३ गते सीआईबीलाई पत्राचार गर्दै प्रसाईंको कारोबारी गतिविधि छानबिन गर्न भनेको थियो।
अनुसन्धानपछि सीआईबीले विशेष सरकारी वकिलको कार्यालयमा प्रतिवेदन बुझाएको थियो। त्यसकै आधारमा सरकारी वकिलले १८ करोड ४४ लाख रुपैयाँको बिगो कायम गर्दै जरिवाना र कैद सजाय माग गरेको थियो। साथै पीडित राहत कोषमा क्षतिपूर्ति भराउन माग गरिएको थियो।
प्रसाईंमाथि ‘राउन्ड ट्रिपिङ’ (नयाँ लगानी देखाउने नाममा पैसा आफ्नै संस्थामा फर्काउने) र ‘रिलेटेड पार्टी ट्रान्जाक्सन’ (आफ्नै नातेदार वा सम्बन्धित पक्षहरूसँग कारोबार गरी अनियमितता गर्ने) जस्ता शंकास्पद कारोबार गरेको आरोप लागेको छ।
अदालतले आदेशमा उल्लेख गरेअनुसार, “प्रसाईंले अदालतमा बयान दिँदा कसुर अस्वीकार गरेका छन्। तर उनीमाथि कर्जा अपचलन, राउन्ड ट्रिपिङ तथा लेयरिङ गरेको भन्ने आरोप कागजातहरू, सहप्रतिवादीका बयान र छानबिन समितिको प्रतिवेदनका आधारमा गरिएको छ।”
अदालतले प्रसाईंलाई हालका प्रमाणका आधारमा निर्दोष ठहर गर्न नसकिने स्पष्ट पारेको छ।
मुद्दा के हो?
– दुर्गा प्रसाईंमाथि १८ करोड ४४ लाख रुपैयाँको अपचलनको आरोप
– नेपाल राष्ट्र बैंकको निर्देशनमा सीआईबीले अनुसन्धान
– बैंक तथा वित्तीय संस्थामार्फत शंकास्पद कारोबारको आरोप
– सरकारी वकिलले कैद, जरिवाना र क्षतिपूर्ति माग गरेका थिए
तर हाललाई अदालतको आदेशअनुसार, २५ लाख धरौटी बुझाएर प्रसाईं रिहा भएका छन्।
