बुढानीलकण्ठस्थित निवासमा टाँसियो सूचना, आरजूले साउन अन्त्यमा बयान दिने ।
झापा ।सम्पत्ति शुद्धीकरण अनुसन्धान विभागले पूर्वप्रधानमन्त्री एवं नेपाली कांग्रेसका सभापति शेरबहादुर देउबाका छोरा जयवीर देउबालाई सात दिनभित्र विभागमा उपस्थित हुन निर्देशन दिएको छ। आयभन्दा बढी सम्पत्ति आर्जन तथा मनी लन्ड्रिङ सम्बन्धी चलिरहेको विस्तृत अनुसन्धानका क्रममा विभागले यो कदम चालेको हो।
अनुसन्धानका क्रममा केही महत्वपूर्ण र गम्भीर विषयहरूमा स्पष्टीकरण तथा थप जानकारी आवश्यक देखिएकाले सूचना प्राप्त भएको मितिले सात दिनभित्र विभागको कार्यालयमा उपस्थित हुन भनिएको छ। विभागको टोलीले सो कानुनी सूचना देउबा परिवारको बुढानीलकण्ठस्थित निवासमा टाँस गरिसकेको छ। म्यादभित्र उपस्थित नभए कानुन बमोजिम अगाडि बढ्ने विभागको तयारी छ।
यसअघि विभागले सोही प्रकरणको छानबिन र सोधपुछका लागि पूर्वप्रधानमन्त्री देउबा र उनकी पत्नी एवं परराष्ट्र मन्त्री आरजू राणा देउबालाई समेत बोलाइसकेको छ। आरजू राणा देउबाले भने हालै विभागलाई पत्र पठाउँदै आगामी साउन महिनाको अन्त्यसम्ममा उपस्थित भई आवश्यक जानकारी र स्पष्टीकरण बुझाउने जानकारी गराएकी छन्। देशकै शीर्ष राजनीतिक नेतृत्व र पूर्वप्रधानमन्त्रीको परिवारमाथि सुरु भएको यो उच्च-प्रोफाइल अनुसन्धानलाई राजनीतिक र कानुनी वृत्तमा निकै चासोका साथ हेरिएको छ।
