इरानका नव-नियुक्त सर्वोच्च नेता (सुप्रिम लिडर) मोजतबा खामेनेई पदभार ग्रहण गरेपश्चात् पहिलो पटक सार्वजनिक रूपमा देखा पर्ने सम्भावना बढेको छ। इरानको अर्ध-सरकारी सञ्चारमाध्यम ‘तस्नीम न्यूज’ का अनुसार, सर्वोच्च नेता मोजतबाले आफ्ना दिवंगत पिता आयातोल्लाह अली खामेनेईको स्मृतिमा आयोजना हुन गइरहेको सार्वजनिक प्रार्थना सभाको नेतृत्व गर्ने भएका हुन्।
प्राप्त विवरण अनुसार, यो विशेष प्रार्थना कार्यक्रम आगामी शनिबार फातिमा मासूमेहको मजार परिसरमा अवस्थित इमाम खुमैनी प्रार्थना हलमा आयोजना गरिने तय भएको छ। आफ्ना पिताको निधनपछि गत अप्रिल महिनाको सुरुवातमै मोजतबा इरानको सर्वोच्च पदमा चयन भए तापनि सुरक्षा संवेदनशीलताका कारण अहिलेसम्म उनी सार्वजनिक रूपमा बाहिर आएका थिएनन्।
यसअघि, इजरायली र अमेरिकी सम्भावित हवाई आक्रमणको उच्च जोखिमलाई मध्यनजर गर्दै मोजतबा आफ्ना पिताको अन्तिम संस्कार तथा शवयात्रा कार्यक्रममा समेत सहभागी भएका थिएनन्। उक्त शोक सभामा उनका अन्य तीनजना भाइहरू तेहरानको ग्रान्ड मोसल्ला धार्मिक स्थलमा उपस्थित रहे तापनि मोजतबाको अनुपस्थितिले अन्तर्राष्ट्रिय वृत्तमा अनेकौँ अड्कलबाजीहरू उब्जाएका थिए।
स्मरण रहोस्, पूर्व सर्वोच्च नेता अली खामेनेईको गत फेब्रुअरी महिनाको अन्त्यतिर इजरायल र अमेरिकाको संयुक्त सैन्य कारबाहीमा परी निधन भएको थियो। करिब एक हप्तासम्म चलेको राजकीय शोक र शवयात्रापश्चात् उनको पार्थिव शरीरलाई देशको सबैभन्दा पवित्र शिया तीर्थस्थल, मशहदस्थित ‘इमाम रजा’ को दरगाहमा समाधिस्थ (दफन) गरिएको छ। उक्त शवयात्रामा देश-विदेशका करोडौँ श्रद्धालुहरूको उपस्थिति रहेको दाबी गरिएको छ।
शनिबार हुने यस सार्वजनिक प्रार्थना सभामा मोजतबाको उपस्थितिलाई लिएर अहिले मध्यपूर्व (मिडल इस्ट) र विश्व राजनीतिमा चासोका साथ हेरिएको छ।
