हल्दीबारी, झापा । झापाका ग्रामीण क्षेत्रमा क्रियाशील पत्रकारहरूको साझा संस्था ‘ग्रामीण प्रेस क्लब झापा’ जिल्ला प्रशासन कार्यालय झापामा विधिवत रूपमा दर्ता भएको छ। श्रमजीवी पत्रकारहरूको हक अधिकारको रक्षा, पेसागत सुरक्षा र आम सञ्चार क्षेत्रको चौतर्फी विकास एवं प्रवर्द्धन गर्ने उद्देश्यका साथ यो संस्था स्थापना गरिएको हो। झापाका दुई छिमेकी गाउँपालिका हल्दीबारी र बाह्रदशीका सञ्चारकर्मीहरू यस संस्थामा आबद्ध रहेका छन् भने यसको मुख्य कार्यालय हल्दीबारी गाउँपालिका वडा नं. ४ स्थित मंगलबारे बजारमा रहनेछ।
संस्थाको नेतृत्व नेत्रविक्रम विमलीले सम्हाल्नुभएको छ। उहाँको अध्यक्षतामा गठन गरिएको ११ सदस्यीय कार्यसमितिमा उपाध्यक्ष पितम कुमार धमला, महासचिव हैकम राज घिसिङ, सचिव मनोज तिवारी र कोषाध्यक्ष शान्ता उप्रेती चयन हुनुभएको छ। त्यसै गरी सदस्यहरूमा टीकाराम बास्तोला, राजेश आचार्य, असफाक आलम, जनकलाल राजवंशी, आशिष राई र अभिषेक खतिवडा रहनुभएको छ। समितिका पदाधिकारी तथा सदस्यहरू सञ्चारकर्मका सक्रिय रहँदै आउनुभएको छ।
नयाँ दर्ता भएको यस क्लबले ग्रामीण क्षेत्रको सञ्चार जगतलाई थप मर्यादित र व्यवस्थित बनाउन भूमिका खेल्ने विश्वास लिइएको छ। विशेष गरी मोफसलमा रहेर पत्रकारिता गर्ने सञ्चारकर्मीहरूको क्षमता विकास र उनीहरूको पेसागत समस्या समाधानका लागि संस्थाले आगामी दिनमा विभिन्न रचनात्मक कार्यक्रमहरू सञ्चालन गर्ने लक्ष्य राखेको छ। हल्दीबारी र बाह्रदशी क्षेत्रका पत्रकारहरू एउटै मञ्चमा संगठित भएसँगै यस क्षेत्रको सामाजिक तथा भौतिक विकासका मुद्दानहरूलाई अझ सशक्त रूपमा उठान गरिने क्लबका अध्यक्ष विमलीले बताउनुभयो।
