काठमाडौं। अमेरिकी उपराष्ट्रपति जेडी भेन्सले इरानसँगको उच्चस्तरीय वार्ता बिना निष्कर्ष टुङ्गिएको घोषणा गरेका छन्। पाकिस्तानमा २१ घण्टासम्म चलेको सघन संवादपछि दुई देशबीच कुनै सहमति हुन नसकेको हो।
एक संक्षिप्त पत्रकार सम्मेलनलाई सम्बोधन गर्दै उपराष्ट्रपति भेन्सले अमेरिकी प्रतिनिधिमण्डलले राखेका सर्तहरूलाई इरानले स्वीकार नगरेको जानकारी दिए। “हामीले इरानसामु स्पष्ट खाका राखेका थियौँ, तर तेहरानले वासिङ्टनका सर्तहरू स्वीकार नगर्ने बाटो रोज्यो,” भेन्सले भने।
लामो समयदेखि जारी तनाव कम गर्ने उद्देश्यले पाकिस्तानमा उक्त वार्ता आयोजना गरिएको थियो। वार्तामा मुख्यतया परमाणु कार्यक्रम, क्षेत्रीय सुरक्षा र प्रतिबन्धहरूका विषयमा छलफल भएको बताइएको छ। यद्यपि, दुवै पक्षबीच कुन बुँदामा कुरा मिल्न सकेन भन्नेबारे विस्तृत विवरण सार्वजनिक गरिएको छैन।
अमेरिकी अडान र इरानी अस्वीकारले मध्यपूर्वको भू-राजनीतिक अवस्था थप अन्योलग्रस्त बन्ने देखिएको छ। वार्ता विफल भएसँगै अब अमेरिकाले चाल्ने आगामी कदमलाई निकै चासोका साथ हेरिएको छ।
