बिर्तामोड (झापा) — नेपाली कांग्रेसका सभापति गगनकुमार थापाले नेपाली कांग्रेस कसैको पनि निजी (प्राइभेट) कम्पनी नभएको स्पष्ट पार्नुभएको छ ।
नेपाली कांग्रेस झापाले मङ्गलबार आयोजना गरेको जिल्लास्तरीय बृहत् भेलालाई सम्बोधन गर्दै सभापति थापाले कांग्रेस कुनै व्यक्ति विशेषको निजी सम्पत्ति नभई लोकतान्त्रिक मूल्य, मान्यता र लाखौँ कार्यकर्ताको रगत–पसिना तथा योगदानबाट स्थापित भएको ऐतिहासिक पार्टी भएको बताउनुभयो ।
”कांग्रेस कसैको निजी प्राइभेट कम्पनी होइन,” नेता थापाले भन्नुभयो, “यो लाखौँ कार्यकर्ताको योगदानले उभिएको संस्था हो, यसलाई कसैले पनि आफ्नो निजी सम्पत्तिका रूपमा बुझ्ने भूल गर्नु हुँदैन ।”
पार्टीभित्र सानो–ठूलो भन्ने कुनै पनि किसिमको विभेद स्वीकार्य नहुने उल्लेख गर्दै उहाँले सबै नेता तथा कार्यकर्ताले आफ्नो जिम्मेवारी सहनशील, अनुशासित र जिम्मेवार ढङ्गले पूरा गर्नुपर्नेमा जोड दिनुभयो । पार्टीलाई थप मजबुत र गतिशील बनाउन आपसी एकता, सहकार्य र सङ्गठनात्मक अनुशासन अपरिहार्य रहेको उहाँको भनाइ थियो ।
मुलुकको वर्तमान राजनीतिक अवस्थाबारे चर्चा गर्दै थापाले देशमा लोकतन्त्रको सुदृढीकरण, सुशासन र आर्थिक समृद्धिका लागि नेपाली कांग्रेसले सधैँ नेतृत्वदायी भूमिका निर्वाह गर्दै आएको दाबी गर्नुभयो । आगामी दिनमा जनताको विश्वासलाई अझ मजबुत बनाउने गरी काम गर्नुपर्ने आवश्यकता औँल्याउँदै उहाँले पार्टीलाई समयानुकूल रूपान्तरण गर्दै युवाहरूको सहभागितालाई व्यापक बनाउनुपर्नेमा जोड दिनुभयो ।
