२८ साउन, काठमाडौं । झापाको सार्वजनिक जग्गा व्यक्तिको नाममा नामसारी गरेको अभियोगमा विशेष अदालतले नेकपा माओवादी केन्द्रका नेता रेवतराज पुरी, जसलाई गगन पुरीका नामले पनि चिनिन्छ, सहित नौ जनालाई दोषी ठहर गरेको छ।
अदालतका अध्यक्ष टेकनारायण कुँवर र सदस्यहरू मुरारीबाबु श्रेष्ठ तथा रितेन्द्र थापाको इजलासले दोषी ठहर गर्ने फैसला सुनाएको हो।
दमक नगरपालिका–१३ र १४ मा पर्ने रतुवा र दिपिनी खोला दोभानको उत्तरतर्फको सार्वजनिक जग्गा हिनामिना गरेको आरोपमा नापी तथा मालपोत कार्यालयका कर्मचारी, जग्गाधनी र बिचौलियाविरुद्ध मुद्दा दायर भएको थियो।
अदालतले अन्य दोषीको नाममा रहेको जग्गा जफत गर्ने आदेश पनि दिएको छ।
यसअघि पनि गगन पुरी सम्पत्ति शुद्धीकरण मुद्दामा विशेष अदालतबाट दोषी ठहर भइसकेका छन्।
