भद्रपुर, फागुन ३ । नेपाली कम्युनिस्ट पार्टी (नेकपा) झापा क्षेत्र नं. ३ क्षेत्रीय समितिले आगामी निर्वाचनका लागि आफ्नो २६ बुँदे प्रतिबद्धता पत्र सार्वजनिक गरेको छ। उक्त प्रतिबद्धता पत्र झापा क्षेत्र नं. ३ का उम्मेदवार डिल्ली घिमिरे ‘हिक्मत’ले भद्रपुरमा आयोजित पत्रकार सम्मेलनमा वाचन गर्दै, आगामी निर्वाचनमा विजयी भएमा विभिन्न सामाजिक र राजनीतिक सुधारको लागि कडा कदम चाल्ने प्रतिबद्धता व्यक्त गरे।
घिमिरेले आफ्नो प्रतिवद्धतामा भने, “हामी क्षेत्रको विकास र नागरिकको अधिकारका लागि शून्य भ्रष्टाचार, सुशासन, र ट्राफिक जाम समस्या समाधानको लागि विशेष पहल गर्ने छौं। साथै, सडक विस्तार र हात्ती नियन्त्रणका लागि कार्ययोजना बनाउनेछौं।”
उहाँले नागरिकका प्रमुख सरोकारका विषयहरू, जस्तै शिक्षा, स्वास्थ्य र रोजगारका क्षेत्रमा सुधार गर्न प्रतिबद्धता जनाए।
यस अवसरमा पार्टीका केन्द्रीय सदस्य पुष्पराज पोखरेलले क्षेत्रको आगामी निर्वाचनमा आफ्नो पार्टीको जित सुनिश्चित रहेको दाबी गर्दै, “४ गतेदेखि घरदैलो कार्यक्रम सञ्चालन गरिनेछ,” भन्ने जानकारी पनि दिनुभयो।
नेता मोहन टुडुले पनि आफ्नो पार्टीले देशभर नवयुवा उम्मेदवारहरूलाई उठाएको हुँदा पार्टीको बहुमत ल्याउनेमा आफूहरू विश्वस्त रहेको बताउनुभयो।
पत्रकार सम्मेलनको संचालन पार्टी केन्द्रीय सदस्य देवेन्द्र किशोर ढुङगानाले गर्नु भएको थियो।
विशेष बुँदाहरू:
भ्रष्टाचारमुक्त झापा: शून्य भ्रष्टाचार र सुशासनको वचन ।
सडक र यातायात सुधार: सडक विस्तार र यातायात जामको समस्या समाधान ।
हात्ती नियन्त्रण: क्षेत्रीय कृषि र जंगली जनावर नियन्त्रणका लागि पहल ।
शिक्षा र स्वास्थ्य सुधार: नागरिकका प्रमुख हकका क्षेत्रहरूमा सुधारका लागि योजनाबद्ध कार्य ।
नवयुवा उम्मेदवार: पार्टीले नवयुवा उम्मेदवारको चयन गरी नयाँ जोश र उत्साहका साथ निर्वाचनमा सहभागी हुने योजना।
पार्टीले आगामी निर्वाचनमा आफ्नो मजबुत स्थान स्थापित गर्न समग्र समाज र क्षेत्रको हितमा कार्य गर्ने प्रतिबद्धता व्यक्त गरेको छ।
