दुनै, डोल्पा । डोल्पाको सदरमुकाम दुनैमा शनिबार आयोजित एक विशेष भेलाले नेपाल स्वयंसेवी रक्तदाता समाजको ४५ औं जिल्ला शाखा गठन गरेको छ। स्थानीय ब्लू सीप होटलको सभाकक्षमा सम्पन्न उक्त भेलाले स्वास्थ्यकर्मी एवं सामाजिक अभियन्ता राजन कुमार डाँगीको अध्यक्षतामा ११ सदस्यीय नयाँ कार्यसमिति सर्वसम्मत चयन गरेको हो
नयाँ कार्यसमिति विवरण: भेलाले कार्यसमितिको पदाधिकारीहरूमा निम्न अनुसार चयन गरेको छ:
अध्यक्ष: राजन कुमार डाँगी
उपाध्यक्ष: दिलमाया के.सी.
सचिव: कर्ण वि.क.
कोषाध्यक्ष: मिनराज बुढा (बिबश)
सदस्यहरू: सुमन थापा, जयकृष्ण हमाल, प्रेम थापा, नवीनकुमार शाही, रूपलाल बोहरा, आनन्द सिंह रावल र चन्द्रराज बुढा।
साथै, समितिको पहिलो बैठकले राज्यलक्ष्मी हमाल र डा. अखण्ड उपाध्यायलाई सदस्य पदमा मनोनित समेत गरेको छ।
कार्यक्रमका प्रमुख अतिथि र विशेष व्यक्तित्वहरू:
डोल्पा जिल्ला अस्पतालका मे.सु. डा. सिजन रावलको सभाध्यक्षतामा सम्पन्न उक्त कार्यक्रममा नेपाल स्वयंसेवी रक्तदाता समाजका केन्द्रीय अध्यक्ष एवं सर्वाधिक स्वयंसेवी शतक रक्तदाता श्री प्रेमसागर कर्माचार्य प्रमुख अतिथिको रूपमा रहनुभएको थियो।
विशेष अतिथिका रूपमा जिल्ला प्रशासन कार्यालय डोल्पाका सहायक प्रमुख जिल्ला अधिकारी रमेश पौडेल उपस्थित हुनुहुन्थ्यो। त्यस्तै अतिथिहरूमा नेपाली सेनाका सेनानी संग्राम सार्दुल, डा. अजय प्रसाद पाण्डे, दीपक राज भट्ट र सुवास रानाको उपस्थिति रहेको थियो।
मानवीय सेवाको उच्च नमुना: छात्रालाई उच्च शिक्षासम्मको छात्रवृत्ति
कार्यक्रमको एक विशेष र भावुक क्षणमा, केन्द्रीय अध्यक्ष प्रेमसागर कर्माचार्यले मानवीय सेवाको उदाहरण प्रस्तुत गर्नुभयो। उहाँले दुनै स्थित ध्रुवतारा आधारभूत विद्यालयको अपाङ्ग स्रोत कक्षामा अध्ययनरत कक्षा ४ की छात्रा शर्मिला बि.क. को कक्षा १२ सम्मको सम्पूर्ण अध्ययन खर्च व्यक्तिगत रूपमा व्यहोर्ने प्रतिबद्धता व्यक्त गर्नुभयो।
शुभकामना तथा सम्मान
कार्यक्रमका प्रमुख अतिथि कर्माचार्यले नवगठित कार्यसमितिका पदाधिकारीहरूलाई खादा ओढाई सम्मान गर्दै बधाई तथा सफल कार्यकालको शुभकामना दिनुभयो। उहाँले ‘रक्तदान जीवनदान’ को पवित्र अभियान अब डोल्पाका कुना-काप्चासम्म पुग्ने र यसले जिल्लाको स्वास्थ्य सेवामा टेवा पुग्ने विश्वास व्यक्त गर्नुभयो।
नवगठित समितिका अध्यक्ष राजन कुमार डाँगीले जिल्लामा रगतको अभाव हुन नदिन र रक्तदान सम्बन्धी जनचेतना फैलाउन आफ्नो टोली सक्रियताका साथ लाग्ने प्रतिबद्धता जनाउनुभयो।
