झापा (एजेन्सी) । दक्षिणी फिलिपिन्सको तटीय क्षेत्रमा सोमबार बिहान ७.८ म्याग्निच्युडको शक्तिशाली भूकम्प गएको छ। भूकम्पपछि फिलिपिन्स र छिमेकी देश इन्डोनेसियाका तटीय क्षेत्रहरूमा सुनामीको उच्च जोखिम रहेको भन्दै सतर्कता अपनाउन चेतावनी जारी गरिएको छ। फिलिपिन्स इन्स्टिच्युट अफ भोलकानोलोजी एन्ड सिस्मोलोजीका अनुसार स्थानीय समय अनुसार बिहान ७:३७ बजे भूकम्प गएको हो। भूकम्पको केन्द्रविन्दु मिन्डानाओ टापुको सरङ्गानी प्रान्तमा पर्ने मासिम सहरको तटभन्दा ३२ किलोमिटर दक्षिण-पश्चिममा ३३ किलोमिटर गहिराइमा रहेको चिनियाँ समाचार संस्था सिन्ह्वाले जनाएको छ।
भूकम्पलगत्तै फिलिपिन्सका अधिकारीहरूले देशका नौवटा तटीय प्रान्तहरूमा सुनामीको चेतावनी जारी गरेका छन्। ती क्षेत्रका बासिन्दाहरूलाई तुरुन्तै थातथलो छाडेर उच्च स्थानमा जान वा भित्री भूभागतर्फ स्थानान्तरण हुन कडा निर्देशन दिइएको छ। सुनामीको पहिलो लहर सोमबार बिहानै तटीय क्षेत्रमा ठोक्किने र त्यो केही घण्टासम्म जारी रहने प्रक्षेपण गरिएको छ। स्थानीय सञ्चारमाध्यमहरूका अनुसार शक्तिशाली कम्पनका कारण केन्द्रविन्दु आसपासका केही भवनहरूमा भौतिक क्षति पुगेको छ भने विद्युत आपूर्ति पूर्ण रूपमा अवरुद्ध भएको छ। भूकम्पको धक्का मिन्डानाओका आसपासका अन्य प्रान्तहरूमा समेत जोडदार रूपमा महसुस गरिएको थियो।
केन्द्रविन्दु नजिकका क्षेत्रमा कडा कम्पन महसुस भए तापनि फिलिपिन्स वा इन्डोनेसिया दुवै देशमा हालसम्म कुनै मानवीय क्षति अर्थात् मृत्यु वा गम्भीर घाइतेको विवरण भने प्राप्त नभएको अधिकारीहरूले बताएका छन्। भूकम्प गएको मिन्डानाओ फिलिपिन्सको दोस्रो ठूलो टापु हो, जुन विश्वकै सबैभन्दा बढी भूकम्पीय जोखिम भएको क्षेत्र मानिन्छ।
यसैबीच फिलिपिन्सको भूकम्पपछि छिमेकी देश इन्डोनेसियाले पनि सुनामीको चेतावनी जारी गरेको छ। इन्डोनेसियाको मौसम विज्ञान, जलवायु विज्ञान तथा भूभौतिकी एजेन्सीले सोमबार बिहानै एउटा विशेष बुलेटिन जारी गर्दै उत्तर-पूर्वी इन्डोनेसियाका तटीय क्षेत्रहरूका लागि प्रारम्भिक सुनामीको चेतावनी जारी गरेको हो। भौगोलिक अवस्थितिका कारण फिलिपिन्स र इन्डोनेसिया प्रशान्त महासागरीय ‘रिङ अफ फायर’ मा पर्दछन्। विभिन्न टेक्टोनिक प्लेटहरू जोडिएको यो क्षेत्र विश्वकै सबैभन्दा बढी भूकम्पीय सक्रियता र ज्वालामुखी विस्फोटका लागि चिनिन्छ।
