बिर्तामोड, ५ असार: विद्यार्थीहरूको अन्तर्निहित क्षमतालाई उजागर गर्ने र उनीहरूको सिर्जनशीलतालाई प्रोत्साहन गर्ने उद्देश्यका साथ झापाको बिर्तामोड नगरपालिकाको आयोजनामा नगरस्तरीय बौद्धिक प्रतिभा प्रदर्शनी भव्य रूपमा सम्पन्न भएको छ। महेन्द्र रत्न माध्यमिक विद्यालयको प्राङ्गणमा आज आयोजित यस विशेष प्रदर्शनीमा नगर क्षेत्रभित्रका विभिन्न सामुदायिक तथा संस्थागत विद्यालयका विद्यार्थीहरूले उत्साहजनक रूपमा आफ्नो बौद्धिक तथा सांस्कृतिक प्रतिभा प्रदर्शन गरे। नगरपालिकाले विद्यार्थीहरूको चौतर्फी विकासका लागि प्राथमिक तहदेखि माध्यमिक तहसम्मका बालबालिकालाई लक्षित गर्दै विभिन्न विधामा प्रतियोगिताहरू सञ्चालन गरेको थियो।
प्रदर्शनी अन्तर्गत कक्षा १ देखि ३ सम्मका विद्यार्थीहरूका लागि खुला चित्रकला प्रतियोगिता आयोजना गरिएको थियो, जसमा मोहनमाया माध्यमिक विद्यालयका आशिक मर्डी प्रथम हुन सफल भए। सोही विधामा सहारा साकोसका मौषम महराले द्वितीय, न्युटन्स एकाडेमीकी कास्मी शिवाकोटीले तृतीय तथा एभेन्चर एकाडेमीकी स्वीकृति गड्तौला र निधि सेकेण्डरी स्कुलकी तृषिका तिम्सिनाले सान्त्वना स्थान हासिल गरे। त्यसैगरी, परम्परागत सीपलाई प्रवर्द्धन गर्ने उद्देश्यले कक्षा ४ देखि ५ सम्मका विद्यार्थीबीच आयोजित बाती कात्ने प्रतियोगितामा जनता आधारभूत विद्यालयका अमित हेमरम प्रथम, शहीद लक्ष्मी आधारभूत विद्यालयकी अपिया लिम्बु द्वितीय, लक्ष्मीनारायण आधारभूत विद्यालयका तेन्जिङ शेर्पा तृतीय तथा एमेटी सेकेण्डरी स्कुलकी रेशिका खतिवडा र मोहनमाया माध्यमिक विद्यालयकी रिया प्रसाई सान्त्वना भए।
साङ्गीतिक क्षेत्रतर्फ कक्षा ६ देखि ८ सम्मका विद्यार्थीहरूका लागि आयोजित तबला वादन प्रतियोगितामा न्युटन्स एकाडेमीका आरोग्य शिवाकोटीले प्रथम स्थान हासिल गरे भने कञ्चनजङ्घा माध्यमिक विद्यालयका विश्वदीप सिटौला द्वितीय र एमेटी स्कुलका कोशलेक्स रिजाल तृतीय भए। उक्त विधामा तक्षशिला बोर्डिङ स्कुलका आशिम गौतम र देवी माध्यमिक विद्यालयका सुदिन ढुंगेलले सान्त्वना पुरस्कार प्राप्त गरे। यसका साथै, माध्यमिक तहका कक्षा ९ र १० का विद्यार्थीहरूको साहित्यिक प्रस्फुटनका लागि नेपाली कविता लेखन तथा वाचन प्रतियोगिता सञ्चालन गरिएको थियो। सो प्रतियोगितामा ग्लोरी इङ्ग्लिस बोर्डिङ स्कुलकी दीपिका प्रसाई प्रथम, न्युटन्स एजुकेशन एकाडेमीका निश्चल पाठक द्वितीय, बुद्ध स्मृति एकाडेमीकी युगश्री मिश्र तृतीय तथा गोमेन्द्र स्कुलकी आयुष्मा उप्रेती र कञ्चनजङ्घा बोर्डिङ स्कुलकी सृष्टि खरेल सान्त्वना बन्न सफल भए।
प्रतियोगिताका सबै विधामा उत्कृष्ट स्थान हासिल गर्ने विजेता विद्यार्थीहरूले क्रमशः ६ हजार, ५ हजार, ४ हजार र सान्त्वना पुरस्कारस्वरूप जनही २/२ हजार रुपैयाँ नगदसहित प्रमाणपत्र प्राप्त गरेका छन्। विजयी छात्रछात्राहरूलाई कार्यक्रमका प्रमुख अतिथि बिर्तामोड नगरपालिकाका उपप्रमुख नगेन्द्र प्रसाद संग्रौला, शिक्षा शाखा प्रमुख उपसचिव तिलचन भण्डारी, न्युटन्स एजुकेशन एकाडेमीका प्रिन्सिपल देवेन्द्र हुमागाईं, निधि माध्यमिक विद्यालयका प्रधानाध्यापक भीष्म प्रसाई र महेन्द्र रत्न माध्यमिक विद्यालयका सहायक प्रधानाध्यापक केशव प्रसाईलगायतले पुरस्कार तथा प्रमाणपत्र वितरण गर्नुभएको थियो। बिर्तामोड नगरपालिकाले विद्यार्थीहरूको सिर्जनशीलता, अतिरिक्त क्रियाकलाप र क्षमता अभिवृद्धिका लागि हरेक वर्ष यस प्रकारको नगरस्तरीय प्रतियोगितात्मक कार्यक्रम निरन्तर रूपमा आयोजना गर्दै आएको छ।
