झापा, पुस १७ — झापाको बिर्तामोड नगरपालिका–४ स्थित बिर्तामोडबाट करिब १ किलोमिटर दूरीमा लागुऔषधसहित तीन जनालाई प्रहरीले नियन्त्रणमा लिएको छ।
मिति २०८२ पुस १७ गते राति करिब ९ बजे इलाका प्रहरी कार्यालय अनारमनी र लागुऔषध नियन्त्रण ब्युरो काँकडभिट्टाबाट खटिएको संयुक्त प्रहरी टोलीले उनीहरूलाई पक्राउ गरेको हो। पक्राउ पर्नेमा दमक नगरपालिका–४ का २३ वर्षीय राजा माझी, दमक नगरपालिका–१ का २९ वर्षीय टेकबहादुर कुमाल र सोही स्थानका ३३ वर्षीय हर्कबहादुर कुमाल रहेका छन्।
प्रहरीका अनुसार उनीहरूको साथबाट खैरो हिरोइनजस्तो देखिने लिसाइलो पदार्थ प्लास्टिकसहित ७ ग्राम ४३० मिलिग्राम (प्लास्टिक बाहेक ६ ग्राम १५० मिलिग्राम), प्रतिबन्धित औषधि ‘Nitrozepam tablets IP (Nitrosun® 10)’ लेखिएको ६ पत्ता अर्थात् ५५ ट्याब्लेट, दुई थान स्क्रिन टच मोबाइल फोन र एक थान कीप्याड मोबाइल फोन बरामद गरिएको छ।
पक्राउ परेकाहरूलाई इलाका प्रहरी कार्यालय अनारमनीमा राखी थप अनुसन्धान भइरहेको प्रहरीले जनाएको छ।
