भद्रपुर, झापा । झापाको भद्रपुर नगरपालिका वडा नम्बर ५ स्थित राजन चोकबाट प्रहरीले ठूलो परिमाणको लागूऔषध ब्राउन सुगरसहित एक जनालाई नियन्त्रणमा लिएको छ। विशेष सूचनाका आधारमा वडा प्रहरी कार्यालय भद्रपुरबाट खटिएको प्रहरी टोलीले बिहीबार दिउँसो करिब साढे २ बजेको समयमा भारतबाट नेपालतर्फ पैदल आउँदै गरेका व्यक्तिलाई शंका लागि चेकजाँच गर्दा उक्त लागूऔषध बरामद गरेको हो।
पक्राउ पर्नेमा भारतको पश्चिम बंगाल, दिनासपुर घर भई हाल झापाको बिर्तामोड नगरपालिका वडा नम्बर ६ स्यालडाँगी बस्ने ३३ वर्षीय मो. जाबिर आलम रहेका छन्। प्रहरीले खानतलासी गर्दा निजले लुकाई–छिपाई ल्याएको खैरो रङको लिस्याइलो पदार्थ (ब्राउन सुगर) फेला पारेको थियो। बरामद गरिएको उक्त पदार्थ प्लास्टिकसहित जोख्दा ५ ग्राम ९८० मिलिग्राम र प्लास्टिक बाहेकको खुद तौल ५ ग्राम ६२० मिलिग्राम रहेको जिल्ला प्रहरी कार्यालय झापाले जनाएको छ।
लागूऔषधसहित नियन्त्रणमा लिइएका आलमलाई आवश्यक कानुनी कारबाही र थप अनुसन्धानका लागि जिल्ला प्रहरी कार्यालय झापामा राखिएको छ। सीमा क्षेत्रमा लागूऔषध ओसारपसार बढ्न सक्ने भन्दै प्रहरीले पछिल्लो समय जाँचबुझ र निगरानीमा थप कडाइ गरेको छ।
