राजवंशी भाषिक कविता: “गरीबेर जिन्दगी”
ले रे जिन्दगी , ले रे ?
केतेक लिबो , गरीबेर परिक्छा।
ताँहनी हबे , मोर मन्डा खाँट्
दबाए राख्मु , हर इक्छा ।।
संघर्षे गरीबेर , जिन्दगी हए
भुलिए निजामु , आफ्नार निष्ठा ।
कर्तव्य मोर त , जीवन हए
हार खाबार , निकरिम चेस्टा ।।
लिए आसेक तुई , अग्नी बातास
धुपे जलालअ , नि-जिराम कोइठा?
मेहनते त जीवनेर , संसार हए
मोर ईमान पाबो , जेईठा सेईठा ।।
रास्तात फिकालअ् , जे गिट्टी पथल
फिँनाए जालअ् , ठेङ्त काँटा ।
ताँहनी छरिम , हात-पाँअ चलुवा
सहनशीलता हए ,मोर रक्तेर नाता ।।
ना मुई हऊ , दयार भिकारी
माँगिए खाबार , निकरु आशा।
स्वाबलम्बी जीवन , मोर साँर हए
पुर्खासे जराल छे , मोर रक्तेर नाता।।
जोगेन्द्र प्रसाद राजवंशी
कचनकवल :-३, दल्की झापा
हाल :- मलेशिया
